Header Ads

  • Berita Tebaru

    Ulah inovasyen deka nempa Sarawak nyadi kuasa digital

    Datuk Patinggi Abang Johari
    Mayuh peluang dagang disedia perintah dikena nambah penatai pemisi rayat nengah chara ‘online’: Abang Johari.

    MIRI: Kepala Menteri Sarawak, Datuk Patinggi Abang Johari Tun Abang Openg madah, dikena ngenegapka gaya pengawa inovasyen deka mai Sarawak nyadi kuasa digital dalam timpuh 10 tauka 20 taun.

    Kelimpah ari nya, ngemeranka pengawa inovasyen enggau kreativiti kelebih agi dalam servis perintah nentuka rayat ulih ngasaika pemansang belalauka pekara ekonomi enggau pengelantang rama ti tegap.

    Kepala Menteri, Datuk Patinggi Abang Johari Tun Abang Openg madah nengah pengawa ngemeranka ulah inovasyen deka ngujungka Sarawak ulih nyadi kuasa digital dalam timpuh 10 tauka 20 taun.

    Kelimpah nya, ulah inovasyen enggau kreativiti lebih agi ba servis perintah ulih nentuka rayat ngasaika pemansang bepelasarka sukut ekonomi enggau atur ti nyengala nadai bechiping.

    “Nengah pemansang ekonomi digital ke majak ngerembai mayuh peluang dagang enggau chara dikena nambahka penatai pemisi nengah chara ‘online’ disediaka perintah,” ku iya.

    Berindik ari nya, iya ngarapka rayat deka gawa enggau bejalaika inisiatif kediri empu ngerebut awak ke bisi enggau pengandal ulih ngelempungka tating belanja idup sida lalu nyapai pemujur dalam dagang.

    Pekara tu diterang Abang Johari rambau bejadika pengawa nutup Konvensyen Kumpulan Inovatif dan Kreatif (KIK) renggat nengeri Sarawak, malam ensanus.

    Iya diarika Sapit Kepala Menteri Datuk Amar Douglas Uggah Embas.

    Abang Johari andal ketuai dipegai Sekretari Perintah Sarawak ti dinamik, panjai runding sereta komited, ulih meri semangat orang gawa perintah bela deka begulai ngubah Sarawak.

    Tu mega ulih nambahka produktiviti kereja sereta bejalaika pangku pengawa enggau penuh integriti ba semua pekara.

    “Kitai patut sedia berunding di luar runding baka selama ngambika ngaga ubah enggau terus nyinkang, kelebih agi ba rampa ekonomi digital belalauka penemu ti kompetitif, mari disagam sereta bepun ari bemacham pekara ti seruran berubah,” ku iya.

    Ngelansa pasal konvensyen KIK, ku Abang Johari, rambai jaku ‘Inovasi Memacu Ekonomi Digital’ chukup relevan enggau signifikan enggau pengawa perintah ngubah ekonomi Sarawak ngena teknologi digital.

    Inovasyen nentuka Sarawak ulih ngangkatka diri ari ekonomi konvensional ngagai ekonomi digital baka menua mansang ke bukai ti nguing ngagai chara digital ba bemacham pengawa.

    Rambai jaku meri inspirayen nyadika raban gawa perintah kreatif, inovatif, kompetitif enggau produktif agi ba gaya pengawa raban ti nyulut.

    “Tu asil ari kereja ti kreatif enggau inovatif ukai semina ulih diasaika raban nya aja tang mega ngemai pemaik ngagai servis perintah sereta mangka rayat,” ku iya nerang.

    Berebak enggau nya, Raban DID Kenyalang ari Opis Parit enggau Entali Ai Sarawak Kuching menang Anugerah Inovasi Kepala Menteri ungkup kategori Agensi Negeri ungkup projek Intelligent Gauge (IG) iya nya sistem pemadah tumu bah nengah telemetrik dikena matau tikas ai di kandang menua disadang kena bah tunggal.

    Ungkup kategori Ejensi Perintah Besai dipenggi Raban IMISAR ari Opis Imigresyen Malaysia Sarawak Kuching ungkup projek MARS MIRROR iya nya inovasi pemutar penanggul pemar ngambi gambar nengah chara ‘live capture’ maya atur peminta passport ngagai anak mit, biak ari dua taun.

    Kategori Opis Residen enggau Pelilih pulai ngagai Raban RES-Q5 Opis Residen Bagi Menua Limbang ungkup projek Aplikasi e-DR (Electronic Disaster Report) iya nya aplikasyen penyambung antara ejensi perintah enggau komuniti dalam ripot tumu penusah ngenyit.

    Seraya Raban PEKA-X ari Majlis Bandaraya Kuching Selatan menang kategori Pihak Berkuasa Tempatan ungkup projek CAMOFLEC iya nya kereban dikena mutarka penanggul sambung paip kumbahan ciri-ciri teknologi camera, pam air enggau spring mudah lentur.

    Sama bisi datai Sekretari Kaunsil Kandang Menua sarawak, Tan Sri Datuk Amar Mohamad Morshidi Abdul Gani enggau Sekretari Perintah Besai Sarawak, Dato Mansor Man. #UtusanBorneo

    No comments

    Post Top Ad