Ulah numbuhka raban dalam parti patut dirara. - Berita Iban Online

Header Ads

  • Baru Nyadi

    Ulah numbuhka raban dalam parti patut dirara.

    PRS nadai ngungkupka penuduk ungkup sida ti baka nya laban pengawa nya semina mechahka parti.

    PAKAN: Nadai penuduk ungkup sebarang raban tauka ‘cliques’ dalam Parti Rakyat Sarawak (PRS), ku Sekretari Besai iya Datuk Joseph Salang Gandum.

    Kenu ku iya, penumbuh sebarang raban taja ba renggat baruh nyentuk ngagai ketuai renggat atas semina deka ngelemi sereta mechahka parti.

    Iya madah munyi nya rambau bejadika Aum Ninting Taun PRS Pakan ditu, kemari.

    Sama bisi datai Ketuai Komiti Indu PRS Datuk Seri Doris Sophia Brodie, Sapit Chairman PRS Bagi Menua Kaunsilor Jantan Achong enggau Sekretari Politik ngagai Kepala Menteri Beatrice Kedoh Tajang.

    Nitihku Salang, PRS deka beserakup lalu sebarang pengawa nguji numbuhka raban patut dirara ari neruska juluk.

    “Kitai meseti belajar ari parti politik ke mujur baka Pesaka Bumiputera Bersatu (PBB) ti seruran nadai dipangka penyarut.

    “Kaban sida chukup mereti sereta nemu nitihka sebarang pemutus digaga presiden. Tu laban sida nemu pengawa presiden ngaga pemutus ukai semina bejaku ungkup iya kediri aja tang ke pemaik gempung dalam parti.

    “Sida mega nemu sebedau ngagai pemutus presiden deka berandau dulu enggau ketuai parti sereta, kaban ke bekaul,” ku iya.

    Iya madah nya sebaka enggau nama utai ke dipejalaika dalam PRS iya nya presiden parti Tan Sri Datuk Amar Dr James Jemut Masing dulu mendingka penemu sereta timbal ari ketuai, kaban sereta mensia mayuh.

    Ba pengawa bepilih besai ke deka datai, Salang ke mega Chairman PRS Pakan enggau mega Kaban Parlimen Julau madah, PRS deka ngelempaika kuasa penuh ngagai Dr James milih chalun PRS ke bediri.

    “Aram mih kitai bela seati anang bekelikuhka pekara tu lebih agi ba media rama laban semia sida ke nadai begulai enggau parti deka mantah sereta mansutka penemu ke ulih ngasuh saru nitihka peragam sida empu,” ku tandu iya.

    Ngelansa pasal polisi iya empu, Salang madah Dr James udah ngenukuka nama iya dua kali deka ngetanka penuduk parlimen Julau pengudah berandau enggau bala ketuai parti bukai, kaban PRS enggau mega pengundi.

    “Taja nya udah diputuska PRS pasal aku sekali agi deka ngetanka penuduk nya tang nya bedau nyemetak nyentuk ba hari ngantung nama chalun.

    “Aku enda ngembuan penanggul enggau sida ke ngumbai diri deka nukar aku. Tang bisi sebengkah pekara ke patut ditemu sida iya nya sida enda patut dulu nunu jematan sebedau meraka sungai.
    “Kita begunaka jematan endur bejalai ngambika mujur,” ku iya.

    Salang ngelalau sida ke deka tama dunya politik patut mandangka pengerindu deka gawa ke rayat.

    “Ngembuan pelajar ke tinggi aja enda chukup nyema kita nadai ati deka gawa ke rayat kelimpah betuju nguna politik ke pemaik diri empu aja.

    “Tang sinu amat, iya udah limpang munyiku jaku sempama madah siku orang nya enda tau ngetup jari orang ke udah meri iya makai,” ku tandu iya.

    Nerang silik, Salang ngelalau kaban parti ngambika terus bekerejasama enggau iya sereta semua parti gempung BN enggau mega partu TES ke agi bedau nyereta Barisan Nasional (BN) laban sida ulih mantu nentuka pemujur BN ba pengawa bepilih besai ke deka datai.

    Berebak enggau nya, Salang ba pengerami bisi nyuaka setipikit ngagai lebih 10 iku kaban veteren parti nyadika kelai basa ngagai pengawa sida ke udah nyaup parti ditu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads