Ulih menang majoriti besai enti dichalun baru ko Nyalau. - Berita Iban Online

Header Ads

  • Baru Nyadi

    Ulih menang majoriti besai enti dichalun baru ko Nyalau.

    Sukung ba renggat nembiak redak chukup kering.

    KUCHING: Datuk William Nyalau Anak Badak nyemetak madah iya nejuka rayat empu nyadi saksi meda projek pemansang ti dipejalaika di Lubok Antu, beratika pemanah pengawa enggau rikod aku ti nyadi Kaban Parlimen dia.

    Bejaku ngagai The Borneo Post ba interbiu nengah telefon pagi kemari, Nyalau chukup pechaya iya ulih menang ba penuduk nya enggau majoriti besai nyema Barisan Nasional (BN) enchalunka iya baru ungkup ketiga kali.

    “Bala penyukung aku ba renggat nembiak redak mengkang chukup kering. Nyema aku diberi peluang bediri minta pilih, aku ulih menang enggau majoriti ke besai,” ku iya nyemetak, seraya nambah iya menang 1,610 undi majoriti lebuh ngalahka Nicholas Bawin ari SNAP ba PRU12 sebedau ngalahka dua iku orang kuat, Larry Sng enggau Nicholas Bawin, teulihka 4,091 undi majoriti ba PRU13.

    “Aku ngelempaika pemutus ba parti enggau bala ketuai BN ngambika milih, laban kededua Kaban Kunsil Nengeri (ADUN), Malcolm Mussen Lamoh enggau Dr Johnicol Rayong bisi kaul rat enggau aku. Tambah mega, Mussen tu bala aku empu. Bala ti chukup semak.”

    Nyalau nyemetak madahka majoriti ti majak nambah ukai datai tekala nya lalu tetiap iku kaban politik nemu baka ni pun pengawa ke benar pengudah menang bepilih, gawaka bala pengundi enggau mai pemansang ngagai sitak menua ti besai dipegai iya.

    “Mayuh bala ketuai komuniti enggau ADUN udah bejaku ngambika aku dichalun baru ba PRU14. Mayuh jalai ulih dikena milih chalun lalu Menteri Besai udah nyemetak madah enda ngira baka ni pemar ngelakuka diri, chalun nya meseti orang ti dipilih rayat tauka chalun dipelaba ulih menang,” ku iya.

    Lebuh ditanya senentang pemansang ti udah dipejalai di sitak menua ulu, ku Nyalau, nyauka semua genturung pendiau udah disambung ngagai indu kuasa grid kelimpah sekeda rumah panjai di Ulu Lemanak enggau Engkari.

    Sida ti enda disambung ngagai grid, deka disedia ngena solar hibrid enggau tekat ai hidroelekterik mikro.

    “Ukai mudah bejalaika nya laban begunaka belanja bejuta dikena nyambung rumah panjai di menua ulu ngagai grid,” ku iya nerang, seraya madahka bisi 80 peratus kandang menua di Lubok Antu diatu udah disambung ngagai grid.

    Senentang bekal ai beresi ku Nyalau, 70 peratus Lubok Antu deka dibungkur enda lama agi pengudah projek palan meresi ai baru Lubok Antu, Engkilili beungkus RM57 juta tembu digaga.

    “Konsultan udah ngagai kandang menua nya ngaga pelin silik ungkup, laban penanggul suntuk ai balat endar nyadi di Engkilili diatu,” ku iya, laban penyampau ai ari palan lama enda tetangkupka peminta tubuh peranak ti majak nambah.

    Ku Nyalau nyauka 100 peratus Lubok Antu diatu udah disambung jalai, kelimpah Ulu Engkari enggau Lemanak agi ngena jalai kompeni kayu batang.

    “Aku udah minta agih belanja sepenyampau RM12.5 juta dikena ngemanahka jalai kompeni kayu batang di Lemanak seraya aktiviti ngulihka kayu batang agi chakah dipejalai di Engkari. Pengudah operasyen diketu ila, aku deka ngaga jalai kompeni kayu batang nyadi jalai ti ditengah mensia mayuh,” ku iya nerang.

    Nikalka kenang kontraversial iya tama ngagai politik, Nyalau nyemetak madahka penaluk iya ngagai ketuai Parti Rakyat Sarawak (PRS) nadai bebagi.

    “(Ba tuchung penyarut) aku udah diasuh ngemaduka diri ari pangku pengawa pemesai kanan perintah ngambika ulih bediri minta pilih nyadi chalun ngatika diri ba PRU11, tang alah. Pengudah nya, aku diengkah nyadi chalun BN ba PRU12 enggau PRU13,” ku iya, sekali agi nyemetak madahka iya deka menang enggau majoriti besai nyema dichalunka baru ba PRU14.

    “Aku semina siku orang asal, ransing gawaka rayat enggau rayat ulih nyamin pekara nya nyema kita ngagai kandang menua dipegai aku,” ku iya nyimpul randau. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads