UNIMAS universiti keterubah numbuh ‘Career Lounge’ - Berita Iban Online

Header Ads

  • Baru Nyadi

    UNIMAS universiti keterubah numbuh ‘Career Lounge’

    NYAIN SEMPEKAT: Unimas ti diarika (dua kiba) Kadim nyain MoA enggau JobStreet.com ke diarika (dua ari kanan) Simon, ti deka bekerejasama nengah Public University Graduate Employbility Programme.

    KOTA SAMARAHAN: Universiti Malaysia Sarawak (UNIMAS) nyadi palan pelajar tinggi perintah ti keterubah di Malaysia numbuhka ‘Career Lounge’ nengah Public University Graduate Employbility Programme.

    Mandal Chancellor UNIMAS Prof Datuk Dr Mohamad Kadim Suadi madah, nya berindik ari UNIMAS ke udah mujur nyain memorandum semaya (M0A) enggau JobStreet.com Sdn Bhd, ti deka besaup bejalaika program nya.

    Program nya dibagi ngagai empat segmen iya nya Career Lounge; Student Ambassadors; Career Services Counsellors enggau Executive Review.

    “Enggau temegah ati aku deka madahka kami UNIMAS, universiti perintah di Malaysia ti keterubah numbuhka Career Lounge dalam univerisiti.

    “Career Lounge bepalan ba Pusat Pemajuan Pelajar di Begunan Hal Ehwal Pelajar dan Alumni nyadi ‘one-stop centre’ endur bala nembiak nyikap diri maya keterubah iya minta pengawa, ke bisi disediaka ba UNIMAS JobStreet.com.

    “Kami amat gaga ati madahka diri nempa kerejasama enggau JobStreet.com ke nyadi palan makit kereja ngena chara online pemadu tebilang di Asia,” ku iya dalam aum pengarang berita.

    Dulu ari nya Kadim bejadika Career Lounge & MoA Graduate Employability Programme ke diatur ba Pusat Pembangunan Pelajar, Bangunan Hal Ehwal Pelajar dan Alumni, UNIMAS ditu, kemari.

    “Kami udah milih kaban ke pemadu betul tauka engkeman laban kami deka ke pemadu manah ungkup raban graduate universiti.

    “Baka ke ditemu kitai, JobStreet.com diatu meri servis ngagai lebih 85,000 pengaji korporat di Malaysia ke lalu nyadika sida lumur satu di Malaysia , reti iya kitai ulih ngiga mayuh peluang ba JobStreet.com ti meri penguntung ngagai nembiak enggau rayat Sarawak,” ku Kadim.

    Student Ambassadors enggau Career Services Counsellors deka mantu Pusat Pemajuan Pelajar nengah strategi ngelakuka nembiak nengah pengawa nyendiaka servis dikena ngemansangka pengelandik baka interbiu, nyendiaka CV enggau resume sereta peluang bekerejasama.

    Berebak enggau tu, Kadim madahka senipak enggau penumbuh Digital Sarawak Centre of Excellence, UNIMAS mega deka besaup enggau JobStreet.com ngatur Pameran Kerjaya Online Sarawak sereta ti keterubah di Malaysia.

    “UNIMAS mega deka bekerejasama enggau JobStreets.com ngatur Pameran Kerjaya Online Sarawak. Lalu tu mega keterubah iya diatur di Malaysia.

    “Aku nesau semua peranak Sarawak enda ngira dini endur diau sama bela datai ngagai program tu ila.

    “Nambahka tu kami mega bisi nempa kerejasama enggau ke bukai baka enggau Skim Latihan 1Malaysia (SL1M) enggau ke bukai. Tu ngayanka UNIMAS chakah deka mantu raban graduate,” ku Kadim.

    Kelimpah ari nya, Head of Regional Communication JobStreet.com, Simon Si meri puji ngagai UNIMAS ti bebendar deka mantu sereta nyikap bala graduate ngena penemu ngiga tauka masuk dunya kereja.

    Iya madahka JobStreet.com untung ulih nempa kerejasama enggau UNIMAS sereta univerisiti ke bukai dalam pengawa ngemansangka ‘industry-ready graduate’ nengah program kerejasama baka Career Services Certification enggau Student Ambassador Certification.

    “Kami ngarapka ulih nempa mayuh agi inisiatif enggau UNIMAS ngambika kitai ulih nyapai sereta mantu mayuh agi nembiak begiga ke pengawa ke patut,” ku iya.

    Sama bisi datai ba pengerami nya kemari, Sapit Mandal Chancellor (Pengelantang Pendiau Nembiak enggau Alumni) UNIMAS Prof Mohd Fadzil Abd Rahman enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads