Header Ads

  • Berita Tebaru

    Universiti Swinburne dipinta nempa mesin dikena ngembuah sawit

     Datuk Patinggi Abang Johari Tun Openg
    KUCHING: Kepala Menteri Datuk Patinggi Abang Johari Tun Openg minta Universiti Swinburne di Sarawak sereta di Melbourne, Australia ngaga mesin ke tau dikena ngembuah sawit.

    Ku iya, mesin nya chukup diguna ketegal industri nya diatu napi pemar tusah ngulihka orang gawa ngembuah sawit.

    “Kitai di Sarawak bisi kebun sawit dandang besai tang diatu kitai napi pemar ketegal kurang orang gawa ngembuah sawit.

    “Mai tama orang ari menua luar gawa ba kebun sawit tau ngenataika penanggul rama lalu kitai enggai pekara tu nyadi,”ku iya ba pengerami nutup Pekit Worldskills Malaysia Sarawak (WMS) 2017 ke diatur di BCCK ditu, kemari.

    Abang Johari nambah mesin ngembuah sawit chukup diguna diatu ketegal sawit mega udah nyadi asil ekspot besai Sarawak.

    Iya nambah, raban saintis di Universiti Swinburne meri timbal manah ngagai pinta nya lalu pechaya sida ulih ngadaka pinta nya.

    Ngenang kaul bukai, Abang Johari madah Sarawak nerima agih belanja tambah setengah biliun ba Bajet 2018 dikena ngemansang perengka guna internet.

    “Dulu agi ari tu kitai (Perintah Sarawak) udah ngagihka RM1 biliun dikena ngemansang perengka guna ke tau ngangkatka peneras arus internet di Sarawak.

    “Ninga berita kitai bisi ngagihka belanja penyampau nya, Bajet 2018 ke dibantaika Menteri Besai kena Hari Lima tu tadi nyendia RM1 biliun ungkup tuju ke sama ngagai Sarawak enggau Sabah.

    “Reti nya kitai bisi agih belanja tambah setengah biliun,”ku iya.

    Ba pengerami kemari, Abang Johari bisi nyuaka perais ngagai pemenang Pekit WMS 2017.

    Zacchaeus Labang anak Unyuk ari IBKN Miri menang Anugerah Tangan Emas Kepala Menteri lalu nerima perais mata duit RM5,000, setipikit enggau tropi.

    Iya mega nyadi champian ba kategori ‘Pekit Teknologi Otomobil’ lalu nerima RM3,000, setipikit sereta tropi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: