UPP setuju SPRM meresa dulu chalun ke deka bepilih di PRU14. - Berita Iban Online

Header Ads

  • Baru Nyadi

    UPP setuju SPRM meresa dulu chalun ke deka bepilih di PRU14.

    KUCHING: Presiden United People’s Party (UPP) Dato Sri Wong Soon Koh setuju enggau penemu sereta atur Opis Nagang Penyalah Makai Suap Malaysia (SPRM) meresa dulu chalun ke minta pilih dalam Pengawa Bepilih Besai ke-14 (PRU14) ti deka diatur enda lama agi.

    Wong madah pengawa nyidi nya sigi patut digaga, laban nya pemun singkang ngemendarka chalun ulih minta pilih.

    “Laban enti enda di sidi enggau manah, enggai ke setengah jalai lagi, ditemu bisi ngaga pengawa salah ke tau ngujungka chalun kami enda dikemendarka.

    “Aku besetuju enggau penemu SPRM nya,” ku iya.

    Wong ti mega nyadi Menteri Wang Kedua madahka bepelasarka nama chalun ari UPP empu ke udah disuaka ngagai Menteri Besai (PM) ti mega nyadi Presiden Barisan Nasional (BN), Datuk Seri Mohd Najib Tun Razak enggau Kepala Menteri (KM) Datuk Patinggi Abang Johari Tun Openg ti mega nyadi Chairman BN Sarawak, ku iya, semua nama chalun UPP ke PRU ke-14 udah di sidi semua.

    “Kami (UPP) udah nyidi nama chalun kami, sebedau dianjung ngagai PM enggau KM, aku empu ke meri ngagai seduai,” ku iya.

    Wong ti mega nyadi Menteri Pengawa Dagang Antarabansa enggau E-Dagang madah bedau ulih nyaut sapa chalun ti ngarika UPP lebuh ditanya sapa chalun ke deka bediri maya PRU ke-14 tu ila.

    “Bedau aku ulih madah ngagai kita, ila meh,” ku iya.

    Sebedau tu, SPRM ngelalau parti politik di Malaysia ke deka mantaika nama chalun sida iya ke PRU ke-14, di lalau nganjung nama chalun sida iya dulu ngagai SPRM.

    Ba kenga ke bukai, Kepala Komisioner SPRM Tan Sri Zulkifli Ahmad madah taja pan, nadai ungkup undang-undang tauka atur ke enda tau enda ke parti politik ngaga bansa nya, pengawa nyidi dulu chalun ari SPRM tau digaga ngambika nemu chalun nya nadai ngaga pengawa salah sereta nadai makai suap tauka salah guna kuasa.

    Zulkifli madah, SPRM tebuka dalam pekara nya, lalu nitihka parti politik nnerima manah tauka nimbal lalau nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads