1,000 pesakit di Sepital Sibu dipindah ketegal bisi angus - Berita Iban Online

Header Ads

  • Baru Nyadi

    1,000 pesakit di Sepital Sibu dipindah ketegal bisi angus

    Mua penama Sepital Sibu.
    SIBU: Bisi 1,000 iku pesakit, staf enggau mensia mayuh ke bisi di 18 wad di Sepital Sibu ditu dipindahka ngenyit ngagai endur ti likun pengudah sebun ditemu pansut ari siling agu Wad 23 sepital nya, pagi kemari.

    Penusah angus ke enda besai nya dipelaba ketegal sut tali karan ditemu bala iku indu misi di wad nya urung pukul 8 pagi sebedau ngasuh pemadah penusah angus bebunyi lalu berengkah mindahka pesakit.

    Pemangku Ketuai Bomba enggau Penyah Penusah Zon Sibu, Wan Kamarudin Wan Ahmad ngenukuka penusah nya madahka, raban sida nerima kangau bekaul enggau penusah angus nya urung pukul 8.19 pagi sereta nganjung dua injin enggau bela 10 iku raban ari Opis Bomba enggau Penyah Penusah Sungai Merah enggau Sibu ngesah ngagai sepital nya.

    Nitih ku iya, lebuhka datai ba penusah nyadi, semua pesakit udah tembu dipindah piak sepital ngagai tiga endur likun begempuru.

    “Pekara ti dipejalaika iya nya nyidi pun penusah nyadi sereta ngerara api ngena hos pengerara api di dalam begunan sepital,” ku iya lebuhka dirandau Bernama.

    Bala pesakit enggau indu misi ke gawa di wad ke bukai dikemendar pulai baru ngagai wad sida empu urung pukul 10 pagi seraya pesakit enggau indu misi di Wad 23, diasuh pulai setengah jam udah nya.

    Ku Wan Kamarudin, nadai sebarang penusah bakar diripotka nyadi lebuh penusah nyadi lalu pun penusah ke bendar agi dipansik.

    Iya muji piak Sepital Sibu ti seruran nyikap diri napi penusah nya enggau sikal sereta likun.

    “Piak Sepital Sibu endang suah ngatur latih penusah angus ungkup bala staf.

    Sepanjai taun tu, udah dua kali diatur lalu nitihka penerang, kena 25 Nov tu, sebengkah da agi latih ke sama deka diatur,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads