Header Ads

  • Berita Tebaru

    35 peratus pengereja pengawa bepengelandik tinggi ulih japai

    BELAJAR TINGGI AGI: Riot (empat kiba) nyuaka Setipikit Pengelandik Malaysia(SKM) ngagai seiku penerima di Kuching kemari. Bela dipeda Abdul Aziz (tiga kiba).
    Diatu udah manggai 31 peratus ke alai perintah udah nusun mayuh program dikena nyapai juluk nya #Riot

    SANTUBONG: Tagit 35 peratus pengereja pengawa bepengelandik tinggi manggai ba taun 2020 deka dijapai, ku Menteri Penguasa Pemayuh Pengereja Pengawa Dato Sri Richard Riot Jaem.

    Naka ke diatu ku iya, ikas nya udah manggai ba 31 peratus ke alai perintah udah nusun mayuh program enggau tuju nyapai juluk ke ditetap.

    “Kitai bisi timpuh dua taun agi lalu aku pechaya tagit 35 peratus pengereja pengawa bepengelandik tinggi deka dijapai,” ku Riot.

    Iya mansutka jaku nya rambau bejadi Konvokesyen Sistem Latih Dual Nasional (SLDN) Ke-3 ke diatur di Kampung Budaya Sarawak ditu, kemari.

    Iya nambah nengah Bajet 2018 ke dibantai Menteri Besai bedau lama tu tadi, agih belanja penyampau RM4.9 bilion udah disedia dikena ngemujur Pelin Besai Latih Teknikel enggau Vokesyenal (TVET) Malaysia.

    “Perintah mega nyendia 100 skularship ungkup pelajar ke nyulut nengah agih belanja RM4.5 juta.

    “Tu dikena meransang sida ke udah nembuka TVET nampung pelajar ngagai ikas ke tinggi agi,” ku iya.

    Ngenang kaul ke sama, Riot nambah nengah Atur Pemansang Malaysia Lumpar Ke-11 (RMK11), 3.3 juta pengawa puang udah ditempa.

    Ari penyampau nya ku iya, 60 peratus begunaka pengereja pengawa bepengelandik tinggi iya nya sida ke ngembuan setipikit TVET.

    Ba konvokesyen kemari, 176 iku orang nerima setipikit Pengelandik Malaysia (SKM) ke disedia nengah SLDN ke diperabung Opis Pemansang Pengelandik(JPK).

    Bela datai Chairman Gempung Pemansang Ekonomi Sarawak(SEDC) Tan Sri Datuk Amar Abdul Aziz Husain, Direktor Pemantau Projek (JPK) Dr. Mohamad Sulaiman enggat Direktor JPK Sarawak Zaid Mat San. #UtusanBorneo

    No comments

    Post Top Ad