83 buah gerempung di Sri Aman udah direjista ba ROS - Berita Iban Online

Header Ads

  • Baru Nyadi

    83 buah gerempung di Sri Aman udah direjista ba ROS

    Datuk Masir Kujat
    SRI AMAN: Bisi 64,338 buah Gempung Besai enggau 82,195 Gerempung Pampang ti udah direjista Opis Pengerejister Gerempung (ROS) di serata menua naka pun bulan November taun tu.

    Sapit Menteri Dalam Menua, Datuk Masir Kujat madahka penyampau gempung besai di Sarawak naka tu iya nya 4,087 buah.

    “Ari penyampau nya di Sarawak, 83 buah gerempung udah direjista di Bagi Menua Sri Aman ti ngarika 2.03 peratus gerempung di nengeri tu,” pia ku iya lebuh bejaku bejadika Program Pemesai Begulai Enggau Gerempung Mesra (Friendly Society) enggau Pengawa Nyuaka Geran Bagi Menua Sri Aman di Dewan Suarah semak ditu, malam tadi.

    Ku iya, Gerempung Ukai Dikuasa Perintah (NGO) baka serakup tauka gerempung di nengeri tu nyadi sektor ketiga kelimpah sektor perintah enggau peribit ti ngaul diri ba pengawa pemansang komuniti.

    “Sektor tu nyadi sektor ti ngemeranka pengawa volunteer ke alai batang tuju nya ukai deka ngiga penguntung tang ngintu pengelantang, nyaga pemerat enggau gaya pengidup komuniti di menua nya,” ku iya nerang.

    Masir ke lalu nyadi Kaban Parlimen (MP) Sri Aman nerang, kenyau ari taun 2013, ROS udah ngaga ubah enggau ngemanahka pejalai sistem digital (eROSES) ngemuntangka raban gerempung nganjung peminta rejista, ngemaruka penerang, nganjung penyata ninting taun sereta pengawa ke bukai enggau Ros nengah online.

    “Nya alai sida ti ngatur pengawa gerempung lurus, bisi integriti enggau nitihka peminta Perlembagaan Pertubuhan nya empu, Akta Pertubuhan 1966, Peraturan Peraturan 1984 sereta polisi perintah ti benung diterit,” ku iya nyemetak.

    Nangkan nya ku iya, gerempung mega nyadi’Pengantara atau Orang Tengah’ di antara perintah enggau mensia mayuh ba pejalai polisi perintah ti deka ngemai pemaik ngagai rayat.

    “Nya alai, gerempung nyadi ejen tranformasyen bemacham bidang ti udah diperambu perintah dikena nyapai komuniti beserakup, bekerejasama, diau lantang, bebatak asur, likun sereta senang.

    “Gerempung mega diperansang ngambi kaban ari raban nembiak laban sida tu ulih meri penemu ke baru ti tau ngemai pemansang ngagai gerempung nya,” ku iya madah silik.

    Ba lansa ke bukai, Direktor JPPM Sarawak, Georgina Apphia Ngau madah, rambau program nya, ROS Sarawak nyuaka setipikit ngenang pemanah jasa ngagai 12 buah gerempung di Sri Aman ti udah rejista ngelui ari 30 taun.

    “Pengawa milih tu belalauka rikot pengatur pengawa enggau nganjung penyata ninting taun ti manah ke alai penyata nya nyadi seput ngagai sesebuah gerempung ti rejista enggau ROS,” ku iya nambah.

    Sama bisi datai Sapit Residen Bagi Menua Sri Aman, Philip Peter Salam sereta bala ketuai opis perintah ke bukai.

    Berebak enggau program nya, Masir bisi nyuaka geran penyampau RM10,000 ari ROS Sarawak ngagai Serakup Peranak Sebemban Selanjan, Sri Aman (GASS).

    Pia mega, bisi 12 buah serakup enggau gerempung di Sri Aman nerima setipikit ngenang pemanah jasa ti udah rejista ngelui ari 30 taun. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads