Adat mandangka ‘Junjung’ padi bansa Kedayan agi meruan dikemeran - Berita Iban Online

Header Ads

  • Baru Nyadi

    Adat mandangka ‘Junjung’ padi bansa Kedayan agi meruan dikemeran

    NYADIKA KENANG: Komuniti Kedayan ari Brunei enggau Miri enda muai awak begambar ba siti ari langkau.
    MIRI: Siti ari batang pengawa digaga nyerumba Pengerami Makai Hari Besai di Kampung Danau, Bekenu, Sibuti iya nya mandangka langkau padi tauka dikumbai ‘Junjung’ ba komuniti Kedayan ari 14 buah genturung pendiau enggau serakup ari Bekenu enggau Miri ti narit ati bala pengusung enggau temuai ke bisi datai rambau atur pengerami nya Hari Enam tu tadi.

    Bisi sekeda Junjung dipeda digaga ngena buluh enggau kayu kampung sereta beperabungka daun apong seraya sekeda ke bukai enggau pun pinang dikena mantaika penyelai Junjung nya lalu iya dilagu ngena gaya pengidup komuniti Kedayan kelia.

    Begempuru makai ba hari besai iya nya gempuru pemadu besai komuniti Kedayan di pulau Borneo ke alai bansa Kedayan ari Brunei, Sabah, Labuan, Limbang, Lawas, Miri enggau Sibuti begempuru ngambi bagi dalam pengerami ninting taun.

    Penghulu Salim Ibrahim madah, tu penyelai main asal enggau adat ti meseti ditan ungkup rebak baru ngambika sida nemu kelai peturun sida ereta main asal ti dikemeran.

    “Kitai meseti terus ngetanka main asal enggau adat asal komuniti Kedayan ti ditemu diau ngachir di pulau Borneo tu sereta mega di Semenanjung Malaysia,” ku Salim madah ngagai The Borneo Post.

    Nitih ku Salim, rebak baru jarang endar meda sebarang Junjung di genturung pendiau sida kemaya hari tu laban tebal agi rumah digaga ari kayu enggau bata enggau konsep moden lalu sida nadai kala nemu nama ke patut bisi laban bansa Kedayan tebal agi orang bumai enggau berikan ke diau di sepemanjai kandang tebing tasik.

    Ku iya, Junjung ti didirika genturung pendiau enggau serakup sida empu dalam timpuh seminggu, iya nya seminggu tumu agi sebedau pengerami dipungkal, nengah pengawa beripai antara peranak di genturung pendiau nya.

    Siku peranak Kedayan ari Kampung Selanyau, Amir Yakup madah, taun tu meda penyelai komuniti bisi ngatur makai taun enggau adat asal sida sereta langkau padi asal sida.

    Ku iya, pengawa nyadaka lagu asal Kedayan, kereban muzik enggau bemukun sereta begendang mega bisi dibantaika di Junjung, merindang bala pengusung enggau temuai ke bisi datai.

    “Rindu endar meda mayuh bansa Junjung ti bisi dipandang seraya iya dilagu ngena tekiding, parang, terindak sereta keresa lama komuniti ke bukai,” ku iya nampung.

    Kami ngarapka taun baru Junjung deka didiri enggau dilagu ngena semua keresa sereta dibai bepekit dikena meri peransang ngagai peranak di genturung pendiau, ku iya nambah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads