ADUN menua pesisir dipinta nerang tuju perintah ngaga sekula betumpuk - Berita Iban Online

Header Ads

  • Baru Nyadi

    ADUN menua pesisir dipinta nerang tuju perintah ngaga sekula betumpuk

    Dato Sri Michael Manyin Jawong
    KUCHING: Menteri Pelajar, Sains enggau Pansik Teknologi Dato Sri Michael Manyin Jawong minta semua pengari rayat Kunsil Nengeri (ADUN) menua pesisir nerang ngagai apai indai nembiak ba sitak diri empu tuju enggau langgur ngaga sekula betumpuk.

    Langgur sekula betumpuk ti dilanggur opis menteri iya ku Manyin, dikena mutarka penanggul sekula kurang nembiak (SKM) iya nya sekula ke bisi nembiak kurang ari 150 iku.

    Di serata nengeri tu bisi 651 buah SKM enggau penyampau kurang ari 150 iku ti tebal agi di menua pesisir.

    “Ba penemu kami, sekula dalam kategori SKM tusah deka tampak ari sukut penyulut. Nya kebuah kami ngelanggur ngasuh ditumbuhka sekula betumpuk ungkup SKM.

    “Tang tu ukai pengawa ke muntang sereta patut dipesetujuka apai indai. Nya alai kami minta semua pengari rayat menua pesisir ulih nerang ngagai apai indai pasal tu.

    “Nyema apai indai setuju dia kitai deka berengkah ngaga sekula betumpuk enggau lengkas ba pun taun baru,” ku iya lebuh ke nyaut tanya tambah ari See Chee How (PKR-Batu Lintang) maya Aum Kedua Penggal Kedua Aum Kunsil Nengeri Sarawak Ke-14 ba hari ketiga, kemari.

    Lebuh ke ngenang pasal gaya sekula di nengeri tu, Manyin madahka dalam Bajet 2018 ke dibantaika Menteri Besai, perintah besai bisi ngungkupka belanja sepenyampau RM1billion dikena mutarka sekula ke udah lama sereta jai di nengeri tu sereta belanja nya ungkup dalam timpuh dua taun.

    Nya alai ku iya, timpuh endur bejalaika pengawa ngemanahka sekula ti udah lama sereta jai nya bepanggai ngagai penyampau ungkup belanja ke bisi diterima iya nya RM1billion ungkup taun 2018 enggau 2019.

    Di Sarawak ku iya chukup mayuh sekula ke udah lama sereta jai ke bisi urung 1,020 buah sekula sereta ari penyampau nya bisi 415 buah udah kelalu jai sereta patut digaga baru, lalu Opis Pelajar Nengeri udah ngelala 205 sekula ti dipesukka dalam RMK-11.

    “Lalu 110 buah sekula agi deka dikemanahka ngena duit khas baka ke udah dipadahka Menteri Besai dalam Bejet 2018,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads