Agih ari perintah besai patut diberi terus ngagai ejensi bekaul - Berita Iban Online

Header Ads

  • Baru Nyadi

    Agih ari perintah besai patut diberi terus ngagai ejensi bekaul

    Simoi Peri
    KUCHING: Simoi Peri (BN-Lingga) mansutka langgur penemu minta semua ungkup belanja ari perintah besai diberi terus ngagai perintah nengeri sereta ejensi ke bekaul.

    Kebuah pia ku iya, laban semina opis menteri baka Opis Menteri Pelajar, Sains enggau Pansik Teknologi enggau ejensi ke bekaul ulih ngatur projek sekula enggau lebih manah sereta menyana.

    Iya bepenemu, semina kitai Sarawak ke lebih mereti tauka nemu nama ke pekara ke amat diguna di nengeri tu.

    “Dikena betapi sereta mutarka penanggul projek sekula laun tembu, aku deka ngasuh semua ungkup belanja perintah besai diberi terus ngagai perintah nengeri sereta ejensi ke patut.

    “Isu sekula ti udah lama sereta jai lebih agi di Sarawak endang isu ke dikemeratka raban bansa. Tu ditambah mega enggau kes laun tembu projek sekula, baka ke nyadi di DUN Lingga iya nya Sekula Pulau Seduku, Sri Aman,” ku iya.

    Simoi mansutka penemu nya lebuh ti bejuraika Rang Undang-Undang Perbekalan (2018), 2017 enggau perambu Bajet 2018 ke dibantaika Kepala Menteri, ba aum kedua penggal kedua aum kunsil nengeri Sarawak Ke-18 ba Kompleks DUN ditu, kemari.

    Lebuh ke ngenang pasal isu sekula lama sereta jai di nengeri tu iya madahka, pengawa ngemanah sereta ngaga sekula nya endang amat beguna ungkup nengeri tu.

    Perintah besai beratika peminta nengeri lalu ngungkupka belanja RM1 billion ke tuju nya, tang ku iya, bepelasarka riput berita, Sarawak begunaka RM3billion dikena ngemanahka lebih 1,000 buah sekula lama sereta jai di serata nengeri tu.

    “Penyampau nya (RM1billion) nya lebih baruh ari ke patut.

    “Aku meri penemu ngambika perintah nengeri ulih meda baru lalu mansik sereta nyendiaka lankar ti tegap bakani isu sekula lama sereta jai tu ulih dibantu taja pan kitai sedar isu pelajar bekaul enggau perintah besai.

    “Kitai enggai agi bejudi sereta ngenggaika hak anak kitai lebih agi anak menua pesisir ari ngasaika kereban pelajar ti lebih meruan.

    “Ingat kitai semua, pelajar iya nya ubah ti pemadu bisi dikena ngubat penyeranta,” ku iya.

    Kelimpah ari nya lebuh ke ngenang pasal isu ke nyadi ba sitak DUN Lingga ti diarika iya, Simoi madahka rayat ba kandang menua Maludan enggau Lingga agi nganti pemansang ti kala disemayaka Ex-YAB Kepala Menteri Pehin Sri Datuk Patinggi Adenan Satem maya kimpin pengawa bepilih nengeri (PRN) Sarawak Ke-11.

    Ku iya pekara nya udah dikenataika ngagai Pejabar Kewangan Negeri Sarawak ngambika ulih diperundingka sereta nerima timbal pasal rojek nya.

    “Tu nyengkaum projek ngaga Masjis Maludam, Dewan Masyarakat, ngemanahka Jalai Kampung, Klinik Pengerai enggau Balai Polis di Maludam enggau Riverfront sereta rumah kedai di Lingga, baka ti kala dipadahka deka ulih dirumban ngambika pengari rayat enda disalahka.

    “Nitihka penerang, ke diatu projek nya agi nganti pemendar ari Kepala Menteri,” ku iya seraya beterima kasih ngagai perintah nengeri ti udah ngemasukka Projek Jalan Lingga/Sebuyau dalam RMK-11, laban jalai nya nyadi jalai alternatif peranak menua nya ngagai menua bukai kelimpah ari Lebuh Raya Pan Borneo.

    Nambahka nya, ku Simoi, isu bah ba sitak ke diarika iya lebih agi Maludam enda kala teputar laban bedau nerima pemutus positif.

    Perambu ngaga benteng tauka pintu ai udah dikenataika ngagai Pejabat Kewangan Nengeri nengah randau empat mat lalu diatu benung nganti pemutus ari piak nya, ku iya.

    Ku Simoi musim pengujan nyau deka datai baru sereta ai pasang enggau ujan bangat deka nyadi ngujungka bah nyadi.

    “Dikena betapi enggau penanggul tu, benteng amat beguna ari Tanjung Engkabang ngagai Kampung Hulu Sri Aman sepemanjai 2 kilometer, lalu pekara tu kala dipinta dalam Kunsil (DUN) sebedau tu tang bedau nerima timbal.

    “Baka ti dipadahka piak Opis Parit enggau Entali Ai udah ngenataika keretas perambu ngagai Opis Menteri Pengeraja Asal enggau Rampa Menua, ke alai menteri nya empu udah meda endur nya sereta diberi licha pasal pemesai guna benteng sereta empas ke nyadi maya bah,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads