Agih belanja RTP, MRP semua ungkup rayat - Berita Iban Online

Header Ads

  • Baru Nyadi

    Agih belanja RTP, MRP semua ungkup rayat

    Abdullah Saidol
    KUCHING: Ungkup belanja Projek Transformasyen Menua Pesisir (RTP) enggau Projek Mit Menua Pesisir (MRP) dipelanja enggau nadai belalai sereta lurus.

    Menteri Muda (Hal Ehwal Korporat) Abdullah Saidol madahka projek tauka ungkup belanja RTP enggau MRP nya dipatau Opis Kepala Menteri nengah Sarawak Implementation and Monitoring Unit (SIMU).

    Nitihku iya, tiap iku Kaban Kunsil Nengeri (ADUN) Barisan Nasional (BN) diungkupka perintah nengeri belanja projek RTP sepenyampau RM5 juta dikena bejalaika projek mit di menua pesisir awakka ulih dipejalaika enggau lengkas.

    Ku iya, ungkup belanja RM5 juta nya enda kala terus diberi mata duit ngagai akaun kami (ADUN BN).

    “Ambika chunto ungkup belanja RTP dikena bejalaika projek taun baru (2018), ambika banding baka aku, kandang endur ke diarika aku nya bisi dibaruh kuara bagi menua Sarikei enggau bagi menua Mukah. Aku deka nganjung lis projek dalam sikat ke dijaga aku ngagai opis residen Mukah enggau Sarikei.

    “Udah nya sida (opis residen) nganggarka penyampau belanja sereta projek ke enda tau enda dipejalaika dulu laban ungkup belanja semina bisi RM5 juta, udah nya kami lalu nyain reti iya setuju projek nya dipejalaika taun 2018.

    “Pengudah projek nya dikemendarka, ejensi ti bejalaika pengawa baka Jabatan Kerja Raya, Opis Parit enggau Entali Ai bejalaika projek nya bepelasarka nama ke udah dianjung tauka dipinta nya.

    “Nya chara kami kerja, kami enda kala megai duit (RTP) nya. Ungkup belanja nya diberi nengah residen tauka ejensi ti bekaul,” ku iya dalam aum pengarang berita.

    Abdullah mansutka pekara nya dikena nimbal penerang berita Chong Chieng Jen (DAP-Kota Sentosa) ti nawa tauka nuduh ungkup belanja RTP sereta MRP enda dipejalaika enggau terang.

    Bejaku baru Abdullah madahka RTP ke ditumbuhka niang Pehin Sri Adenan Satem maya ke nyadi kepala menteri lalu ditampung Kepala Menteri Datuk Patinggi Abang Johari Tun Openg dikena ngenyampatka projek mit di menua pesisir.

    “Enti nganti ungkup belanja ari perintah besai, kelalu lama, nya kebuah RTP ditumbuhka,” ku iya seraya madahka ungkup belanja MRP iya nya RM2 juta. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads