Header Ads

  • Berita Tebaru

    Aku ukai ‘hot air’ ba isu LRT

    DATAI BEJADI: Abang Johari(tengah) datai ngulu pengawa ngelanchar Bank Pemansang Sarawak(DBOS) di Kuching kemari
    KUCHING: Kepala Menteri Datuk Patinggi Abang Johari Tun Openg nyangkal tuduh raban penyakal ti ngumbai iya ‘hot air’ ba isu nyikap Kuching enggau perengka pengangkut sistem Light Rail Transit (LRT).

    “Sida (raban penyakal) semina deka ngemaruhka aku lalu ngulihka penguntung ba pekara politik.

    “Tang Sistem LRT nyadi sebengkah perengka pengangkut ti meseti dikemisi mengeri baka Kuching.

    “Nyikap Kuching enggau sistem tu mega nyadi sebengkah program modenisasyen,’ku iya.

    Abang Johari mansutka penerang nya rambau bejadi Bank Pemansang Sarawak (DBOS) ba sebuah hotel ditu, kemari.

    Ku iya nambah, sistem LRT sigi enda mai penguntung ke besai tang perengka pengangkut LRT meseti disedia enti deka ngangkat sistem pengangkut di Kuching nyadi sebengkah sistem ke moden.

    “Kitai deka ngaga sistem LRT tu malai tanah lalu ukai betiang baka ke di Kuala Lumpur lalu chara tu deka ngelimat belanja,’ku iya.

    Iya nambah DBOS deka beranakka puku ba pengawa nyikap Mengeri Kuching enggau sistem LRT.

    Ngenang kaul bukai, Abang Johari mega madah DBOS deka beranakka puku ba pemansang ekonomi digital di Sarawak.

    “Maya DBOS ngepunka operasyen ba bulan Januari 2018 tu ila, bank tu deka ngembuan puku ba penyampau RM450 juta,’ku iya.

    DBOS bejalaika operasyen di Menara SEDC, Isthmus Jalai Bako. #UtusanBorneo

    No comments

    Post Top Ad