#Bajet2018 Sarawak tau minta baru nyema enda chukup - Berita Iban Online

Header Ads

  • Baru Nyadi

    #Bajet2018 Sarawak tau minta baru nyema enda chukup

    Tan Sri Datuk Amar Dr James Masing
    Semua piak patut meretika bajet nya ungkup taun 2018 lalu ukai agih belanja ke diberi tekala nya, ku Masing.

    PELAGUS: Sarawak tau minta belanja tambah nyema penyampau ti diagihka perintah besai dalam Bajet 2018 dibantaika Menteri Besai Datuk Seri Najib Tun Razak kena 27 Oktober tu tadi enda chukup.

    Sapit Kepala Menteri Tan Sri Datuk Amar Dr James Masing madah semua piak patut meretika bajet nya ungkup taun 2018 lalu ukai agih belanja ke diberi tekala nya.

    “Mayuh orang madahka bajet nya enda chukup. Anang beratika iya sekali beri aja. Kitai meseti meretika, deka bisi perambu tau ubah, kitai tau minta baru,” ku iya.

    Iya dirandau pengarang berita pengudah bejadika Program Jangkau Luar Petronas di Sekula Primari (SK) Ulu Pelagus kena Hari Lima.

    Nitih ku iya, Bajet 2018 nyadi siti bajet ti inklusif ari sukut pekara mantu rayat di menua tu.

    Ku iya, dikearap Bajet 2018 nengeri Sarawak ti deka dibantaika maya Persidangan Mesyuarat Kedua Bagi Penggal Kedua Aum Kunsil Nengeri (DUN) Sarawak Ke-18 berengkah ari Hari Satu tu, perintah nengeri deka neruska polisi ‘Go Rural’.

    Ku Masing, tu dikena nentuka pemansang di kandang menua ulu Sarawak ti dikemerat ex-Kepala Menteri Niang Tan Sri Adenan Satem lebuhka megai perintah nengeri, sebedau tu ditampung.

    “Bajet serak tu, pemerat ngagai kandang menua ulu agi ditambung. Aku andal Datuk Patinggi Abang Johari (Tun Openg) deka nampung iya. Tu pengandal aku,” ku iya.

    Petronas begulai enggau laban kaban kunsi dagang melanja RM1.35 juta ungkup program tanggungpengawa rama korporat (CSR) di sekula nya ti mungkur pengawa ngaga sebuah balai, lupak pejalai kaki beperabung, agu baru ba rumah bemalam, pinta tama ngagai sekula enggau ngemanahka perengka guna sekula ke bukai.

    Program ti berengkah digaga bulan March nyin tadi meri pemaik ngagai 54 iku nembiak, 14 iku pengajar sereta semilan iku staf sekula di kandang menua ulu nya. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads