DANI nyukung gempuru likun tanah NCR SADIA - Berita Iban Online

Header Ads

  • Baru Nyadi

    DANI nyukung gempuru likun tanah NCR SADIA

    Logo Dayak Nation Institute (DANI)
    Mensia mayuh ditesau ngulu gempuru ti deka diatur ba Tebing Sungai Kuching nyerumba aum DUN maya nya ila.

    KUCHING: Dayak Nation Institute (DANI) nyukung gempuru likun tanah NCR ke diatur Gerempung Dayak Iban Sarawak (SADIA) kena 13 November tu.

    Berebak enggau tu DANI ke diarika Rapelson nesau mensia mayuh kelebih agi raban bansa Dayak datai ngagai gempuru ke diatur ba Tebing Sungai Kuching.

    Gempuru nya diatur nyerumba aum kunsil nengeri ke benung diatur maya nya ila.

    Ku iya, kes bekaul enggau tanah ukai semina meri empas ngagai Dayak tang mungkur raban bansa Melayu/Melanau baka Kpg Jemukan, Kpg Semera, Kpg Lubok Bunting enggau Kpg Gumphey.

    Nitih ku Rapelson, sebedau tu sida kala ngatur gempuru bebala mayuh ngena chara lantang lalu nyuaka memorandum ngagai Opis Kepala Menteri dua kali iya nya kena 9 September 2015 maya ngakim kes Tr Sandah enggau 10 Disember 2015 nyerumba Hari Hak Asasi Manusia Sedunia.

    Memorandum nya ku iya disain raban bansa Sarawak ti minta perintah nengeri meri gelar sereta ngaku Pemakai Menua enggau Pulau Galau sereta disua ngagai opis kepala menteri, tang lalu nadai udah nerima timbal bekaul enggau pekara nya.

    Seiti ari resolusyen pekara nya dikena mulaika baru Kanun Tanah Seksyen 5 (2) (f) “kaedah lain yang sah” dikena meri kuasa ngagai undang-undang nyaga tanah NCR di nengeri, lalu semina ulih dikejampatka nengah mosyen ba DUN (Kunsil Nengeri).

    “Nyema perintah nengeri enda bebendar maya aum DUN ke diatur dalam bulan November tu mulaika Seksyen 5 (2) (f), pilih kitai semina nukar perintah BN ke diatu ngagai perintah ke baru,” ku iya meri penemu nengah penerang berita, kemari.

    Apin lama, dalam aum pengarang berita, Sekretari Besai SADIA Nicholas Mujah Ason madahka sida deka ngatur gempuru likun tanah NCR kena 13 November tu, ti minta perintah ngaga ubah jampat pasal Kanun Tanah Nengeri.

    SADIA melabaka lebih 500 iku orang ngulu gempuru ke diatur ba tiga endur nyengkaum Tabing Sungai Kuching, ti minta ubah Bab 58 Kanun Tanah Sarawak.

    Kelimpah ari nya Rapelson madahka DANI mega deka ngatur gempuru bebala mayuh ngena chara manah di mua Kort Federal Putrajaya, Semanjung Malayasia bekaul kes Tr Masa Nangkai enggau Perintah Nengeri Sarawak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads