Ekonomi Digital ngenyampatka pemansang ekonomi nengeri - Berita Iban Online

Header Ads

  • Baru Nyadi

    Ekonomi Digital ngenyampatka pemansang ekonomi nengeri

    Dato Sri Wong Soon Koh
    KUCHING: Menteri Wang II Dato Sri Wong Soon Koh madah, empas ari gaya ekonomi global udah ngubah semua rintai peminta enggau bekal, udah ngelui ari chunto dagang klasik laban bisi kaul makit baru, ke disukung gaya dagang ke tebuka sereta pemujur penyambung digital.

    “Ekonomi digital deka nyadi indu transformesyen ekonomi nengeri,ke deka ngenyampatka pemansang ekonomi ke dikuasa penemu, inovasyen,teknologi digital sereta analisis data.

    “Strategi tu ukai semina ngemujurka Sarawak nuju tikas pemansang ekonomi ti nangkanka nya tang ke pemadu beguna nyendiaka nengeri tu ngambika ulih nyingkang ke mua jemah ila.

    “Dalam konteks tu, Bajet 2018 Nengeri ti ngungkupka urung RM1 bilion ke inisiatif Ekonomi Digital Sarawak ngambika ulih nyapai juluk nyungkak pemansang ekonomi nengeri tu nyingkang jauh agi,ngurangka seraka tikas sosio-ekonomi,meri peluang kereja sereta pengawa dagang nengah e-commerce,meransang bala nembiak sereta nempa rega nengah inovasyen enggau dagang sereta nyapai e-government ke bepengelandik, nyata, pechaya enggau pengarap ati,” ku Wong.

    Iya madah munyi nya lebuh Nyimpul Jurai iya bekaul enggau Opis Menteri Wang ba Aum Kedua, Penggal Kedua, Aum Kunsil Nengeri Sarawak ke-18 di Komplek Kunsil Nengeri (DUN) ditu, kemari.

    Wong ti mega nyadi Menteri e-dagang madah, nyadi sebuah nengeri ke ngembuan ekonomi tebuka,menua tu mudah tepanjuk bepelasarka penegap ekonomi global sereta dalam kandang menua Asia.

    “Beguna endar nengeri tu majakka pengawa ngemansangka ekonomi nengah pengerembai pengawa beranakka puku,ti ulih nempa pemujur pemansang ekonomi dalam timpuh ke panjai.

    “Penumbuh DBOS (Bank Pemansang Sarawak) enggau PETROS (Petroleum Sarawak) entara puku ke strategik sereta inisiatif ti dipungkal nengeri tu ngambika ulih ngenyampatka pemansang nengeri sereta bulih pemujur ari pemisi kitai ke lalu ngangkatka ekonomi domestik ungkup timpuh ke panjai,” ku iya.

    DBOS ku iya, sebuah bank pemansang keterubah dibuka di Sarawak lalu beguna amat ba model wang baru dikena nyukung agenda pemansang menua tu.

    “Pengawa bank tu nyendiaka sukung wang turu dikena ngaga projek strategik sereta puku ke deka meri asil ngagai nengeri dalam timpuh ke panjai.

    “Kelimpah ari nya, pengawa numbuhka PETROS sama bisi pemerat ngambika nengeri tu mega nyadi penyereta dalam industri gis enggau minyak,” ku iya.

    Dalam pejalai nyapai tikas menua ke ngembuan pemisi ke besai manggai ba taun 2030, perintah nengeri mega deka ngangkatka pengawa pansik enggau pemansang (R&D) ke nyadi sebagi ari pemisi baru ke menua tu, ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads