Entulu deka nyaup nerang pasal PM, PG ngagai Perintah Besai - Berita Iban Online

Header Ads

  • Baru Nyadi

    Entulu deka nyaup nerang pasal PM, PG ngagai Perintah Besai

    Datuk Joseph Entulu Belaun
    KUCHING: Menteri ba Opis Menteri Besai Datuk Joseph Entulu Belaun deka nerang pasal konsep Pemakai Menua (PM) enggau Pulau Galau (PG) tanah Adat Bansa Asal (NCR) ngagai Perintah Besai nyema bisi pematut dibantaika.

    Ku iya, taja isu tu ari baruh bidang kuasa perintah nengeri, iya deka bejalaika pengawa diri meri penerang pasal konsep PMPG laban iya ketuai bansa Dayak dalam Kabinet Besai.

    “Aku deka nyaup nyema bisi pematut laban Perintah Besai endang patut nemu konsep ti nyemetak. Nya alai, deka nerang nyema aku patut,” ku Entulu madah ngagai The Borneo Post bedau lama udah.

    Bisi diripot ari sekeda portal berita ke alai Presiden Parti Bansa Dayak Sarawak (PBDS) Baru Cobbold John Lusoi, deka mai abis nadai 80 iku pengempu tanah ngagai gempuru likun ba Kort Besai di Putrajaya kena 7 November.

    Nitih ku Cobbold, tuju mai bala pengempu NCR ngagai Putrajaya ngambi ulih ngayanka sida enda puas ati ba mayuh isu ti mangka sida, kelebih agi ba pemutus Kort Besai apin lama ke udah, ti nginsil pemutua kededua Kort Tinggi enggau Kort Apil ngelaban pengempu tanah ba Genturung Pendiau Lebur.

    Cobbold mega madah, iya deka mai bala pengempu tanah ngagai Putrajaya ngambika Perintah Besai ulih mulaika tanah ngagai pengempu ti patut.

    Ngenang pasal isu bekaul, Entulu ke mega Sapit Presiden PRS madah, agih belanja ninting taun sepenyampau RM30 juta ari Perintah Besai ungkup Opis Tanah enggau Survei Nengeri dikena bejalaika pengawa nyukat kelingi tanah NCR endang chukup lalu ngarapka opis nya deka ngena memanah ngambika perintah nengeri ulih minta mayuh agi belanja dudi hari.

    “Kami ngarapka agih belanja deka dikena Opis Tanah enggau Survei memanah, ngambika mayuh agi pengempu tanah NCR bulih pala tanah sida,” ku iya.

    Nyebut pasal Bajet 2018 ti dipejuraika Menteri Besai Datuk Seri Najib Tun Razak bedau lama udah, Entulu madahka iya ‘komprehensif’ lalu nya deka mai penguntung ngagai semua serak komuniti.

    “Ke amat, belanja ke besai penyampau agi bisi diagih ungkup subsidi barang di Sarawak enggau Sabah ngambika rega barang enggau servis sebaka enggau di mengeri besai di menua tu,” ku iya nambah, ambika chunto minyak sumai, berau enggau tong gis LPG nyadi antara chara ti pulaika pemaik ngagai peranak di menua pesisir.

    Entulu ke mega Kaban Parlimen (MP) Selangau enggai nimbal pasal pekara milih iya nyadi chalun maya Pengawa Bepilih Besai Ke-14 (PRU14) ti deka datai, seraya madahka manah agi pekara nya dilempai ba bala ketuai tetinggi Barisan Nasional (BN). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads