Hak Sarawak dalam MA63 deka majak dikemeratka - Berita Iban Online

Header Ads

  • Baru Nyadi

    Hak Sarawak dalam MA63 deka majak dikemeratka

    Datuk Patinggi Abang Johari Tun Openg
    KUCHING: Perintah nengeri deka majak chakah ngemeratka hak Sarawak dalam Sempekat Malaysia 1963 (MA63), dikena nyaga tauka ngelindung ekonomi ungkup rayat rebak baru tauka dudi Sarawak jemah ila.

    Kepala Menteri, Datuk Patinggi Abang Johari Tun Openg madah, nya bekaul enggau pengawa minta baru hak rayat sereta nengeri tu baka ke udah ditulis dalam MA63, ngambika enda dichiping.

    Ku iya, rayat Sarawak kelalu pechaya. Diatu rayat Sarawak lebih bejejaga laban mayuh anak lelaki anak indu kitai ti bepelajar tinggi, nemu macha nemu nulis sereta nemu nama utai ke benung nyadi.

    “MA63 nya enda ulih diubah semua  tauka menua ke udah nyain sempekat nya baka perintah besai, perintah Sarawak, perintah Sabah enggau United Kingdom. Perintah besai pan enda ulih ngubah sempekat antarabansa.

    “Kitai (perintah) di Sarawak deka majak n gemeratka hak kitai dalam MA63, laban enti kitai enda nyaga, nadai orang bukai ke ulih ngereja tauka nyaga.

    “Kami enggau bebendar deka ngemeratka hak kitai ari baruh MA63, laban kitai deka ngelindung  pemesai guna  ekonomi ungkup rebak baru tauka dudi Sarawak jemah ila,” ku iya.

    Abang Johari ti mega Menteri Wang enggau Pengatur Ekonomi mansutka pekara nya lebuh ke nyimpul jurai ba hari ke penundi Aum Kedua Penggal Kedua Kunsil Nengeri Sarawak Ke-18 ba Kompleks DUN ditu, kemari.

    Lebuh ke ngenang pasal peminta nambahka penyampau royalti enggau pampas petroleum ari 5 peratus ngagai 20 peratus, iya madahka perintah deka terus chakah minta hak nengeri tu, baka ke dipinta ba taun ke sebedau tu.

    “Aku patut ngaku kitai enda mujur minta 20 peratus. Rega minyak ti enda meruan meri penanggul ngagai perintah sereta kompeni minyak. Mayuh kompeni minyak nutup kedai.

    “Maya ke diatu, nguji ngubah model dagang nya pekara ti sensitif. Taja pia ukai reti kitai ngetu minta baru hak kitai ba petroleum.

    “Peminta nambahka penyampau royalti chara muntang Sarawak terus bulih mata duit. Kenyau ari nya kitai belajar mayuh chara. Kitai belajar nyadi lebih maju ba pengawa kitai ngulihka penguntung ba pengeraja asal baka petroleum” ku iya.

    Berindik ari pekara nya, perintah Satrawak diatu numbuhka industri minyak enggau gis kediri empu iya nya Petroleum Sarawak Berhad (Petros), laban dekaka  mayuh agi peranak Sarawak nyereta dagang petroleum di Sarawak.

    Nengah chara tu ku iya, deka matu nyungkak penatai pemisi peranak Sarawak ke gawa dalam industri petroleum, ku iya.

    “Kitai deka ngena gis kitai empu dikena ngemansangka industri bukai di Sarawak. Pengeraja asal minyak enggau gis kusut lalu kitai patut nempa industri ukai minyak enggau gis dikena ngemayuhka ekonomi kitai,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads