Industri dagang temuai deka majak richah - Berita Iban Online

Header Ads

  • Baru Nyadi

    Industri dagang temuai deka majak richah

    Datuk Patinggi Abang Johari Tun Openg
    KUCHING: Industri dagang temuai Sarawak jemah ila dipelabaka deka majak tampak sereta richah berindik ari pemansang infrastruktur nengeri tu chakah dipejalaika.

    Kepala Menteri, Datuk Patinggi Abang Johari Tun Openg madahka, penyampau temuai ke datai ke nengeri tu mega beduduk ari pengawa ngelakuka produk enggau program dagang temuai di nengeri tu ke majak mayuh sereta bisi atur ke manah.

    Penerebai terus ari kitai ke menua tasik ku iya, nyengkaum Kuching-Shenzhen, penerebai jampat ari Singapura sereta penerebai komesial dipelabaka deka ngerichahka agi kaul.

    “Taun tu kitai nerima 12 peratus (temuai) tinggi agi ari taun nyin tadi dalam timpuh ke sama.

    “Lalu aku beratika dagang temuai kitai jemah ila deka majak tampak laban kitai udah ngemanahka infrastruktur.

    “Malam tu (malam tadi) kitai bejadika jematan (Golden S Bridge) ti deka diberi nama baru ulih Tuai Megai Menua (TYT) kitai sereta diatu mega kitai ngemansangka sebuah agi jematan Satok kitai.

    “Nengah pemansang infratruktur ti baka tu, mengeri Kuching deka majak manah dipeda lalu kitai mega deka nyambungka enggau mengeri bukai di Sarawak,” ku iya lebuh dikerandau raban pengarang berita.

    Dulu ari nya Abang Johari bejadika Majlis Eye-Dotting nyerumba Lumba Parau Naga Antarabansa 2017 ba Tebing Sungai Kuching ditu, lemai kemari.

    Festival regata ke diatur pengelama seminggu ti dipunka enggau pekit perau naga antarabansa ti dipasuk pesereta ari menua Australia, Singapura Indonesia, Thailand, Filipina, Brunei Darussalam enggau Malaysia.

    Nambahka nya, minggu baru lumba perau bidar mega bisi sambut ti manah ari mensia mayuh kelimpah ari pengawa pemandang berang pengelandik jari enggau pemerindang seni, ku iya.

    “Tadi (kemari) kitai meda ‘Rainforest Puppet’ ke alai pesereta ari menua tasik sama bela ngambi bagi lalu tu deka ngeranchakka agi pemansang seni kitai iya nya seni menua kitai enggau menua tasik dipegulaika.

    “Aku dipadahka Datuk Abdul Karim Rahman Hamzah (Menteri Dagang Temuai, Seni, Main Asal enggau Lumba & Main) enggau atur festival ti baka tu dia pengawa ngelakuka dagang temuai kitai lebih bisi atur enggau tersusun.

    Pengerami lumba ai tauka Regata Sarawak diatur berengkah 10 ngagai 19 November tu ba Tebing Sungai Kuching.

    Kelimpah ari bejadika ‘Eye-dotting’ lumba perau naga antarabansa, Abang Johari mega diberi basa bejadika Festival Kraf Sarawak enggau Festival Pemakai.

    Sama bisi datai ngagai pengerami nya kemari, Abdul Karim; Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Muda Pemansang Orang Dagang enggau Dagang Mit & Jelan Pemesai Datuk Mohd Naroden Majais; Menteri Muda Nembiak enggau Lumba & Main Datuk Snowdan Lawan sereta ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads