Jalai tebing tasik Miri, Bintulu ti enda likun ditengah deka diputar lengkas - Berita Iban Online

Header Ads

  • Baru Nyadi

    Jalai tebing tasik Miri, Bintulu ti enda likun ditengah deka diputar lengkas

    Datuk Julaihi Narawi
    MIRI: Perintah nengeri deka nentuka sekeda endur enggau palan ti enda likun di semanjai jalai tebing tasik ti nyambung Miri enggau Bintulu lalu ngiga jalai ti pemadu manah dikena mutarka penanggul nya.

    Menteri Muda Jalai Tebing Pantai Sarawak, Datuk Julaihi Narawi madahka kelimpah ari bahu jalai ti mit, bisi sekeda endur ti enda likun ngagai penguna di jalai tebing tasik ti suah ngasuh penusah bebadi nyadi nyengkaum bebadi nyawa.

    “Bisi mega sekeda palan ti tau ngeruga pengelikun sereta suah endur penusah bebadi di jalai alun nyadi nyengkaum bebadi nyawa, kelimpah bisi sekeda simpang ti patut diperatika.

    “Ari perati kitai sehari tu, gaya jalai nya ti mit sereta enda likun ngagai penguna jalai, tambah mega jalai semina dua lorong aja,” ku iya.

    Bejaku ngagai pengarang berita pengudah ngatur pejalai ngabas jalai tebing tasik Miri-Bintulu empu ti ngaul pejalai ari Miri ngagai pasar Niah ditu, kemari, ku Julaihi, iya udah ngerah raban Opis Kereja Raya (JKR) ngambi mansik sereta ngiga jalai mutar pemadu manah dikena mutarka penanggul nya.

    “Kelimpah ari nya, bisi mega simpang tama ti enda likun di sepemanjai jalai nya ti deka diperati lalu kitai ngelempai ngagai raban JKR mutarka penanggul tu.

    “Ambika chunto, nyema jalai mit, sida tau nangkin iya besai agi tauka mansik pemutar ke bukai, kitai neju ngagai sida laban sida nemu agi enggau nama pengawa ti patut dipejalai ila,” ku iya nambah.

    Ngelansa pasal perambu peranak menua nya ti ngasul ngelekatka lampu jalai ba jalai ke petang, ku Julaihi, perambu nya kala dibantai ngagai opis menteri bekaul lalu ngaku penanggul nya patut diperatika.

    Ku iya, raban sida deka nentuka sapa bagi raban kaunsil kandang menua ti deka ngintu jalai nya, sebedau kitai ulih nyerah ngagai sida ngambika pengawa ti patut ulih dipejalai.

    “Nyema jalai ti di baruh kaunsil mengeri, kitai deka nyerah ngagai sida lalu pia mega nyema jalai di baruh bidang kuasa Kaunsil Pelilih (Subis), ke alai kitai deka minta sida bejalaika pengawa ti patut dikena mutarka iya,” ku iya nerang silik.

    Berebak enggau nya ku Julaihi, sida mega bisi berandau pasal juluk deka muka sebuah palan ‘Rawat dan Rehat’ (R&R) di jalai nya ngambika bisi endur mensia mayuh ngetu enda lama, ti engkeman enggau likun.

    “Pemisi palan R&R tu, penguna jalai alun ti lelak tauka ngantuk, tau ngetu ba endur tu, ti likun agi sereta disikap ngena perengka guna enggau pekara ke bukai,” ku iya nampung baru.

    Ukai semina naka nya aja ku iya, opis menteri nya mega deka beratika peminta ke bukai ungkup peranak di genturung pendiau laban bisi mayuh genturung pendiau enggau rumah panjai di sepemanjai jalai tebing tasik nya.

    Kelimpah ari ngabas jalai tebing tasik nya, Julaihi enggau sida sebuat mega bisi ngabas Jematan Bekenu meda gaya jematan nya ti udah tau ditengah tang apin tembu lalu agi digaga ba renggat kepenudi.

    Sama bisi nyempulang pejalai Julaihi iya nya Kaban Kunsil Nengeri (ADUN) Lambir, Ripin Lamat, Pemesai Pelilih Sibuti, Husini Bakir, Injinir JKR Bagi Menua Miri, Chong Chi Fam sereta bala pengari ari Opis Residen enggau Opis Pelilih Miri. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads