Jematan Batang Samarahan dipelaba tembu June 2018 - Berita Iban Online

Header Ads

  • Baru Nyadi

    Jematan Batang Samarahan dipelaba tembu June 2018

    Dato Sri Fadillah Yusof
    KOTA SAMARAHAN: Jematan Batang Samarahan ke digaga enggau ungkus RM93 juta sereta dalam pemanjai 774 meter dipelaba tembu sereta deka dibuka ngagai mensia mayuh manggai 28 June 2018.

    Menteri Kereja Raya (KKR), Dato Sri Fadillah Yusof kemari lebuh datai ngenyit ngabas projek tu beratika pemansang pengawa ngaga jematan nya.

    “Enti nitihka ripot atas keretas, projek tu bejalai enggau manah, tang kami di KKR deka meda kediri empu ni naka pemansang projek tu,” ku Fadillah maya datai dia, kemari.

    Sama bisi nyempulang Fadillah beratuika pemansang projek jematan nya, Kepala Sekretari Opis Menteri KKR, Dato Zohari Akob sereta pegawai enggau injinir KKR enggau Opis Kereja Raya (JKR) Sarawak.

    Penembu jematan nya ila, deka nyadi penyambung infrastruktur ke berat ngagai urung 30,000 mensia mayuh ke diau ari sitak Samarahan enggau Asajaya, kelimpah ari deka ngemuntangka pejalai penguna ari Kuching ngagai Asajaya, abis lama 30 minit.

    Diatu, mensia mayuh ke diau di sitak nya, enti ngena kerita entara Kuching-Asajaya tauka Asaja-Kuching, begunaka timpuh urung 90 kilometer baru datai ba endur ke dituju.

    Kekadang, mensia mayuh ngena servis feri sereta jalai darat nengah belakang Universiti Teknologi Mara (UiTM) Samarahan.

    Pemanjai jematan meraka Sungai Batang Samarahan ke nyambung ari Kampung Baru enggau Kampung Tambey tu ila deka ngelengkapka penyambung jalai pesisir pantai di menua tu.

    “Tu nyadi jematan kedua nyambung jalai pesisir pantai, udah Jematan Batang Sadong ke udah tembu digaga lalu dibuka ngagai mensia mayuh taun nyin tadi,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads