JKWS, Palan Internet Komuniti deka ngemujurka program ICT41T - Berita Iban Online

Header Ads

  • Baru Nyadi

    JKWS, Palan Internet Komuniti deka ngemujurka program ICT41T

    Dato Sri Fatimah Abdullah
    SIBU: Opis Orang Indu enggau Ruang Bilik Sarawak (JKWS) nyangka deka begunaka kerejasama begulai enggau Palan Internet Komuniti ngemujurka agi Kus Pengelandik ICT ke diungkup ngagai Indai Tunggal (ICT41T).

    Menteri Pengintu Pengelantang, Pengelikun Mensia Mayuh, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, sebedau tu program nya semina digaga ba Palan Latih Wisma Orang Indu (WWTC) di Kuching aja.

    “Kitai ngembuan juluk ati deka ngaga kus ke sebaka ba endur ke bukai kelimpah ba WWTC tang deka napi penanggul laban kus tu begunaka perengka internet baka komputer.

    “Nya alai, nyangka kitai deka bekerejasama enggau Palan Internet Komuniti nyediaka kereban baka tu lalu ngemujurka kus nya digaga ungkup raban indai tunggal,” pia ku iya madah maya bejadi Program Mega WWTC@ATM Kem RASCOM ditu, kemari.

    Fatimah madah, kelimpah ari kus nya, piak sida mega bisi ngaga Program Women in Digital Entrepreneurship (WIDE) ke endang dikena nimbal peransang Kepala Menteri ti deka ngemansangka Ekonomi Digital ba nengeri tu.

    “Ba kus WIDE, program tu sebengkah ari pansik ke udah digaga kitai ungkup indai tunggal.

    “Siti ari kebuah ke udah ditemu kitai ti nekul sida indai tunggal kereja baru iya nya kurang landik bekenaka komputer.

    “Nya alai, kitai ngatur WIDE enggau program ICT41T tu,” ku iya madah sambil ngarapka penanggul ngulihka penatai pemisi ari pengawa dagang ulih teputar.

    Berebak enggau nya, iya madah, sebengkah ari pekara ti dikemeratka JWKS sepengudah berandau enggau piak ti bekaul, iya nya ngaga siti atur (SOP) dikena nyaup sida ke indu dijamah ba ruang bilik ti nyediaka servis lalau ti nyengkaum ba kes sarak, berebutka anak tauka kes bukai ke bekaul.

    “Sida tu deka dibantu ejensi ti patut enggau lengkas baikka diberi jaku lalau tauka prosedur undang-undang lalu servis tu nyediaka lumur 082-448866,” ku iya nerang.

    Ba Program Mega WWTC@ATM Kem RASCOM, sepenyampau 210 iku penyereta ari raban Badan Kebajikan Keluarga Angkatan Tentera (BAKAT), pemesai enggau raban soldadu indu ngambi bagi ba kus nya dua hari nya.

    Sama bela datai maya tu iya nya Panglima 9 Briged Brigidier Jeneral Dato Dzulkafli Mustaffa, Chairperson BAKAT 1 Divisyen Jacqualine Peris, Chairperson BAKAT 31 Briged Sarimah Mohd enggau Direkter JKWS Noriah Ahmad. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads