JPLS chukup ransing mantu raban orang berikan di Sarawak - Berita Iban Online

Header Ads

  • Baru Nyadi

    JPLS chukup ransing mantu raban orang berikan di Sarawak

    IKAN SIAKAP: Belayong (tengah) mandangka indu ikan siakap ti deka dilepaska ngagai tasik Belawai, kemari.
    BELAWAI: Keterubah iya ba Sarawak, Opis Pengawa Berikan Tasik Sarawak (JPLS) ngelepaska indu ikan siakap ba tasik Belawai dikena nambahka pemayuh ikan nya.

    Pengawa ngelepasaka 300 iku indu ikan nya dipenyadika Direktor JPLS Belayong Nyuak ba Tebing Tasik Belawai ditu kemari.

    Lebuh bejaku ngagai media, Belayong madah, tuju program tu iya nya dikena nambahka pemayuh ikan tasik nya sereta dikena mantu nambahka penatai pemisi orang berikan ditu.

    “Tu keterubah iya ba Sarawak kitai ngelepaska indu ikan siakap ba tasik mayuh mensia, lalu berat indu ikan nya urung dua ngagai tujuh kilogram siku.

    “Siku indu ikan siakap ulih mansutka sejuta ngagai dua juta telu. Kira nyema dikali enggau 300 ratus ikan ke udah dilepas, reti nya iya ulih nambahka penyampau ikan nya ba kandang tasik tu (Belawai),” ku iya seraya madah deka neruska program sebaka ke selampur nengeri tu.

    Iya madah, indu ikan nya asil ari pemeri Wong Chun Toh ke mega siku ari pesereta anak iru JPLS ba Tanjung Manis.

    Nitihku Belayong, taun tu aja, urung 20,000 ngagai 30,000 anak ikan siakap enggau undang rimau udah dilepaska JPLS ba kandang tasik di serata nengeri.

    Dulu ari nya nengah jaku iya bejadika pengawa nya, Belayong madah ari sukut angkat ke darat, ba taun 2016 sitak Tanjung Manis ngasilka 20,078 tan metrik ikan enggau rega runchit manggai RM40 juta.

    “Udah nya, naka September taun tu, asil ikan direjiter iya nya manggai 11,324 metrik tan enggau rega runchit lebih RM25 juta,” ku iya.

    Kelimpah nya, ku iya JPLS taun tu bisi ngengkahka 35 unit tukun alai bemain ba kandang tasik Belawai lalu penyampau agih belanja ke disedia iya nya RM500,000.

    Ku iya, projek tukun nya betuju dikena nagang orang tama nadai pemendar ari menua luar, kelimpah ngemayuh agi asil tasik ba menua tu.

    Kelimpah nya, Belayong meransang mensia mayuh enggau orang berikan ngerembaika asil produk sida baka ‘sesar unjur’ ke chukup tebilang ba Belawai, kerupuk enggau pais ikan ngagai temuai enggau makit luar.

    “Tu beguna amat lalu patut dikerembai ngambika produk tu nyadi produk tebilang ungkup pelilih Tanjung Manis/Belawai,” ku iya.

    Berebak enggau nya, iya bisi nyuaka setipikit ngagai kaban Volunteer Pengawa Berikan (SUPER) ba pelilih nya.

    Iya ngarap, SUPER ke diarika raban orang berikan ba menua tu uli nyadi mata enggau pending piak bekaul nyema bisi sebarang penanggul bekaul enggau aktiviti berikan enda beradat dikereja orang luar.

    Bela bisi datai ketuai Sitak Pengawa Berikan II Sibu Norasmah Mantali, pengari Pemesai Opis Pelilih Tanjung Manis Sufiana Rajeli, ketuai raban bansa enggau orang berikan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads