Header Ads

  • Berita Tebaru

    Kaban BNBBC dipinta lebih regas betimbal penemu enggau penyakal

    MERI PENEMU: Entara 52 iku kaban BNBBC ke bisi ngulu aum nya kemari bela dilalau lebih regas betimbal penemu enggau penyakal ba Aum DUN ke deka berengkah 8 Nov tu.
    KUCHING: Semua kaban Kelab Penyokong Barisan Nasional (BNBBC) Sarawak dipinta lebih regas betimbal penemu enggau raban penyakal.

    Chairman BNBBC, Paulus Palu Gumbang madahka nya entara pekara ti dikerandau dalam aum penuh BNBBC kemari.

    Iya madahka sida iya deka ngiga chara tauka langgur penemu engkeman dikena mutarka isu ke dipelaba bisi dibantaika raban penyakal maya baum Kunsil Nengeri (DUN) ke sekali tu.

    “(Strategi) Nya entara pekara ti dikerandau kami dalam aum tu.

    “Bisi sekeda langgur penemu bakani kami betapi enggau pekara tauka isu,” ku iya lebuh dikerandau raban pengarang berita sebedau nyadi chairman aum penuh BNBBC ke diatur Indu Opis PBB ditu, kemari.

    BNBBC Sarawak bisi 52 iku kaban ti enda nyengkaum menteri enggau menteri muda.

    Bejaku baru iya madahka tiap kali aum kunsil nengeri (DUN) diatur, BNBBC deka ngatur beberapa aktiviti ke limpah ari ke nyadi program tiap taun.

    Aum seharitu berandauka aktiviti ke suah udah diatur nyerumba baum DUN, ku iya.

    “Kami berengkah enggau malam BNBBC, ti deka diatur kena 17 November tu, lalu tu diatur baka selama tiap kali bisi aum DUN.

    “Kami deka berandauka nama main ke diatur, program tiap taun BNBBC,” ku iya ti mega Kaban Kunsil Nengeri (ADUN) Batu Danau.

    Aum DUN tu ila deka diatur 8 ngagai 17 November 2017.

    Sama bisi dalam aum pengarang berita nya kemari, Sapit Chairman BNBBC ti mega ADUN Sadong Jaya Aidel Lariwoo enggau bala kaban kelab nya ke bukai. #UtusanBorneo

    No comments

    Post Top Ad