Header Ads

  • Berita Tebaru

    Kandang menua pesisir patut disikap enggau mayuh tiang telekomunikasyen

    Datuk Wilson Ugak Kumbong
    KAPIT: Kaban Parlimen (MP) Hulu Rajang Datuk Wilson Ugak Kumbong andal mayuh agi tiang telekomunikasyen deka dientak ba kandang menua pesisir seririh enggau pengeransing nengeri tu deka ngenegapka Ekonomi Digital (DE) di Sarawak.

    Pemansang tu ku iya deka nyadi pengepun rayat di menua pesisir chukup disikap enggau perengka guna teknologi kelimpah bepenemu ba teknologi pemadah.

    “Ambika banding baka sida nembiak ke bisi dagang diri empu deka muntang agi bejual asil sida ngagai menua luar nengah chara ngelaku ba internet.

    “Pia mega, sida deka ngelimatka agi puku enggau belanja bebelika kereban dikena ngemansangka dagang diri,” pia ku iya madah maya bejadi Balai Mayuhguna Sekula Primari (SK) Nanga Metah sereta bejadi Pengerami Lumba enggau Main Gerempung Apai Indai enggau Pengajar (PIBG) sekula nya, empai lama tu tadi.

    Ugak mega madah, mensia mayuh ke diau di menua pesisir kelebih agi bepanggai ba pengawa ngaga asil pengelandik jari, betenun pua kumbu tauka asil bukai ke tau dijual dikena ngiga belanja.

    “Enti bisi endur dikena sida ngelakuka barang sida baka nengah internet dia kitai pechaya sida ulih nyungkakka agi penatai pemisi diri tauka ruang bilik,” ku iya madah baru.

    Berebak enggau tu Ugak madahka diri andal agih ba bajet 2018 ti ngungkupka RM1 billion ungkup jalai alun di Sarawak ulih dikena ngemanah enggau ngaga jalai alun di kandang menua pesisir.

    “Jalai ke digaga ba menua pesisir di nengeri baka jalai ari rumah panjai ngelawa pasar besai amat reti ngagai rayat ukai semina deka ngasaika pengelantang tang bekaul enggau penatai pemisi sida,” pia ku iya.

    Ba ungkup ke diberi ngagai sekula, iya ngarapka ungkup nya ulih dipedua enggau manah lalu tau mutarka penanggul rumah sekula ke udah lama.

    “Aku sinu meda nembiak di menua pesisir ke agi besekula ba sekula ke udah lama sereta jai.

    “Taja baka nya sida semampai chakah nurun belajar.

    “Aku mega arapka perintah ngungkupka belanja dikena ngaduka sistem bekal ai ke manah ngagai nembiak enggau bala staft sekula ke bukai,” ku iya madah baru.

    Ba pengerami nya, Ugak bisi meri RM15,000 ngagai PIBG sekula nya ungkup taun 2018 ti deka datai.

    Sama bela datai maya tu iya nya Pemesai Opis Pelilih Bukit Mabong Douglas Punga enggau Kepala Pengajar SK Nanga Metah Ngadit Sawing. #UtusanBorneo

    No comments

    Post Top Ad