KDN deka bebendar nyaup komuniti Penan ngaga Mykad - Berita Iban Online

Header Ads

  • Baru Nyadi

    KDN deka bebendar nyaup komuniti Penan ngaga Mykad

    Datuk Masir Kujat
    SIBU: Pengawa ngaga Mykad ungkup bansa Penan bepenanggul ketegal raban tu semampai enda entap pendiau tauka suah mindah.

    Sapit Menteri Dalam Menua (KDN) Datuk Masir Kujat madah, piak sida endang deka nyaup bansa nya ngaga Mykad enggau setipikit pengada tang bepenanggul ketegal pekara nya.

    “Naka ke diatu bisi 1,670 iti peminta ngaga Mykad enggau setipikit pengada lalu sebagi ari penyampau nya udah ditembu.

    “Ari penyampau tu mega, piak kitai napi penanggul ngaduka bansa Penan ti suah mindah alai diau kelimpah ti jauh mendam ba menua pesisir.

    “Kitai andal amat penanggul tu ulih diputarka,” pia ku iya madah.

    Empai lama tu tadi, Sapit Menteri Besai ti mega Menteri Dalam Nengeri Datuk Seri Zahid Hamidi bisi madahka penanggul rayat di Sarawak ti nadai surat pengelala deka diputar manggai bulan September taun ti deka datai.

    Ahmad Zahid mega udah netapka 1 Disember tu sida ke bisi penanggul ngaga Mykad enggau setipikit pengada deka diputar.

    Masir ti mega Kaban Parlimen Sri Aman madahka piak opis menteri iya udah berandau enggau Opis Menteri Pengintu Pengelikun, Pengelantang Mensia Mayuh, Orang Indu enggau Pemansang Ruang Bilik Datuk Seri Fatimah Abdullah bekaul enggau pekara nya.

    Kelimpah ari nya, iya mega madah, penanggul nadai surat pengelala enggau setipikit bela bisi nyadi ba Sri Aman.

    Ku iya, pun penanggul nya nyadi laban bisi kes ada tang nadai surat tikah enggau jadi enggau peranak menua bukai baka Indonesia.

    “Ambika chunto, apai peranak nengeri Sarawak tang indai orang Indonesia.

    “Nitihka atur, peminta nyadi peranak menua tu sebedau tu, indai nembiak nya meseti peranak asal ari Sarawak.

    “Enti apai indai peranak menua Malaysia lalu seduai ke jadi ditukuka tuai raban bansa lalu bisi mantaika penerang silik baka ke dipinta Opis Pengerijister menua (JPN), nembiak nya deka nyadi peranak menua Malaysia.

    “Aku meda pekara tu enda nyadika penanggul enti sida bisi penerang baka ke dipinta JPN,” ku iya nerang.

    Berebak enggau tu, Masir mega madahka di Sarawak nadai isu nembiak ‘stateless’.

    “Maya aum kabinet mega aku bisi nimbal tanya Kaban Kunsil Nengeri (ADUN) Bukit Assek Irene Chang lalu madahka enda engkeman alai ngangauka nembiak ‘stateless’ laban sida peranak menua tu ke endang bepanggai ba apai indai sida.

    “Tiap iku nembiak deka bisi setipikit pengada nitihka Ordinan Pendaftaran Kelahiran dan Kematian 1951 (Sarawak Cap.10) enti sida ada dirikodka.

    “Sida tu endang bisi setipikit pengada tang semina sida peranak menua tu tauka enda empai ulih ditentuka.

    “Lalu tu deka diputarka kitai,” ku Masir madah baru. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads