Kepala Menteri Sarawak enda setuju enggau penemu Pandikar Amin pasal MA63 - Berita Iban Online

Header Ads

  • Baru Nyadi

    Kepala Menteri Sarawak enda setuju enggau penemu Pandikar Amin pasal MA63

    Datuk Patinggi Abang Johari Tun Openg
    KUCHING: Kepala Menteri Datuk Patinggi Abang Johari Tun Openg madah iya enda besetuju enggau penemu Speaker Dewan Rakyat Tan Sri Datuk Seri Panglima Pandikar Amin Mulia ke madahka Sempekat Malaysia 1963 (MA1963) enda berat.

    “Aku enda besetuju enggau jaku tauka penemu orang tauka penemu Pandikar bekait enggau penemu iya pasal MA1963.

    “Utai ke endar, iya nya, iya (Pandikar) enda tau madahka MA1963 nya enda berat...Aku enda besetuju enggau penemu iya,” ku Abang Johari.

    Iya madah munyi nya lebuh dikerandau pengudah ngepunka Atur Pengawa Konvokesyen PPKS di Palan Konvensyen Borneo Kuching (BCCK) ditu, kemari.

    Abang Johari ti mega nyadi Menteri Wang enggau Pemansang Mengeri madahka, dokumen MA1963 siti dokumen ke berat, laban ba ditu meh hak (territorial) Sabah, Sarawak enggau Semenanjung Malaysia nyadi pemungkal MA1963, ku iya.

    “Enti iya deka madahka MA1963 nya enda berat, ba aku, aku enda sepenemu enggau iya,” ku iya.

    Sebedau tu Abang Johari kala madahka renggat Perintah Menua Sarawak enda bejuraika pekara bekait enggau hak sereta autonomi enggau Komiti Teknikal Penurunan Kuasa ti ditumbuhka ulih Putrajaya (betuaika Menteri Menua Luar, Datuk Seri Anifah Aman enggau Menteri di Opis Menteri Besai, Dato Sri Nancy Shukri alai kededua nya nyadi chairman komiti tu) taun siti nyin tadi, lalu semina deka berunding enggau Sapit Menteri Besai tauka Menteri Kanan aja, ku iya.

    Iya madahka raban khas ke pengabis besai Sarawak ditumbuhka ngambika ulih berunding enggau Putrajaya bekait enggau pekara penurunan kuasa nengah MA1963, semina deka bejuraika pekara nya enggau raban ke betuaika Sapit Menteri Besai, Datuk Seri Ahmad Zahid Hamidi tauka barang menteri kanan ke bisi kuasa.

    Komiti Teknikal ti ditumbuhka ngambika meri sadang ngagai Putrajaya bekait enggau bakani ku kuasa nya ulih diturunka ngagai Sarawak, betuaika Anifah enggau Nancy.

    Jurai tauka aum nya kenu ku jaku udah suah endar baum, berindik ari penumbuh komiti nya dalam bulan Jun taun siti nyin tadi, lalu datai ke diatu, nadai udah meda sebarang asil ke digaga sida iya.

    Taja Abang Johari enda terang endar nyebut pasal (kegagalan) komiti nya, tang muyi ku jaku iya, Nancy enggau Anifah nadai kuasa tauka peuduk bekait enggau pengawa ngaga pemutus dalam pekara nya.

    “Kami nyadang sapit menteri besai ke betuaika komiti tu, laban Nancy enggau Anifah enda ulih ngaga pemutus,” ku Abang Johari empai lama tu tadi maya Aum Kunsil Nengeri.

    Komiti nya nyengkaum sida wakil Perintah Besai, Menua Sabah enggau Sarawak sereta pakar sejarah ari kededua buah menua nya.

    Iya digaga ngambika ngelala pekara ke enda nunda atur ari konteks Ripot Komiti Entara Perintah, MA1963, Genteran Tusun Ukum Malaysia, Perlembagaan Persekutuan enggau ripot betulis bukai tauka dokumen baka Ripot Suruhanjaya Cobbold.

    Enti nitih, komiti nya patut meri sadang sida iya lalu ngemutarka pekara nya ngagai Perintah Besai ngambika ulih diperundingka.

    Taja pia, maya Aum Kunsil Nengeri pun bulan tu tadi, madahka seraban pasukan khas menua, alai penumbuh nya dikemendarka dalam Aum Kunsil Nengeri tu tadi, sereta ke pengabis besai (besai ari tanggung pengawa Nancy enggau Anifah) lalu digulu ulih semua sapit kepala menteri, Datuk Amar Douglas Uggah anak Embas, Tan Sri Datuk Amar James Masing enggau Datuk Amar Awang Tengah Ali Hasan.

    “Ke ditumbuhka di menua tu, ke pengabis besai dibanding enggau Anifah enggau Nancy laban iya bisi bekait enggau jurai Konstitusional.

    “Utai ke digaga kitai enda sebaka enggau Putrajaya. Kuasa nya enda sebaka. Awakka aku bejuraika pekara tu enggau Menteri Besai dulu, lalu nangkan nya ila, aku ngaga pemadah.

    “Taja pia, aku enda besetuju enggau penemu Pandikar Amin Mulia,” ku Abang Johari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads