Kepala pengajar megai tanggungpengawa ti besai di sekula - Berita Iban Online

Header Ads

  • Baru Nyadi

    Kepala pengajar megai tanggungpengawa ti besai di sekula

    Dato Sri Michael Manyin
    MIRI: Kepala pengajar ukai semina pengajar aja tang sida mega orang ti ngatur pengawa enggau nyadi ketuai.

    Sida megai tanggungpengawa ngelangkar sereta nyadi pengatur pengawa besai di sekula sida sereta nyadi pekara pemun dalam tikas penyapai sekula sida, pia ku Menteri Pelajar, Sains enggau Pansik Teknologi Dato Sri Michael Manyin.

    “Beratika pemesai guna kepala pengajar, perintah nengeri begulai enggau Opis Pelajar ngatur konferen tu dikena nyediaka pelasar ngagai semua kepala pengajar bejurai sereta nambahka penemu sereta mega mai sida ngagai chara baru belajar abad 21,” ku Manyin madah ngagai The Borneo Post lebuh dirandau pengudah bejadika Sarawak Headmasters Conference 2017 di Pullman Miri Waterfront ditu, kilah ensana.

    Program tu iya nya gempuru besai ti keterubah ari tiga konferen Kepala Pengajar Sarawakke alai tuju program tu iya nya ngempuruka semua kepala pengajar ditu sereta nyikap sida enggau peransang sereta latih ti bekaul.

    Dua program gempuru besai udah tu deka diatur di Sibu ungkup Wilayah Tengah lalu di Kuching ungkup Wilayah Selatan, pia ku Manyin.

    “Nadai ulih disakal agi kualiti nyadi ketuai kepala pengajar ulih mai bida besai nentuka pemujur tauka pemuntan sekula. Endang dikeandalka aku semua kepala pengajar deka nyaup perintah nengeri enggau Opis Pelajar Nengeri tu ngemuntang pengawa ba semua pejalai program di sekula,” ku iya nambah.

    Manyin ngemeratka program pemansang baka ngangkatka Jaku English enggau pelajar Sains, Teknologi, Injiniring enggau Matematik (STEM) enda mujur enti nadai sukung ari bala pengajar sereta kelebih agi kepala pengajar.

    “Tambah pengawa, pemansang fizikal ti diperambu dikena mutarka isu sekula tuai enggau pengawa begulaika sekula primari mega begunaka kerejasama rat ari kepala pengajar. Aku ngandalka diri deka meda semua program tu dipejalai enggau mujur,” ku Manyin nambah baru.

    Manyin nyemetak madah kenyau ari opis menteri iya ditumbuh dalam pun taun tu tadi, iya enggau bala pemesai bukai ari Opis Pelajar udah berandau begulai beratika penyapai sekula di sereta nengeri sereta mujur berundingka pekara ti meransang enggau enda meransang, ti mangka penyapai sekula.

    “Pekara tu mega dibantai lebuh kitai datai enggau penyampau sekula tuai sereta sekula ti nadai nerima mayuh nembiak ngambika merambu pekara ti patut dipejalai.

    “Kami mega mantaika kes tu ngagai Sapit Menteri Besai enggau Menteri Pelajar di Sibu begulai enggau bala pemesai Opis Pelajar. Ba awak tu, direktor Pelajar Sarawak udah mantaika gambar sekula tu lalu kami mujur ngasuh sapit menteri besai andal lalu iya nanya kami berapa penyampau belanja dikena mutarka semua penanggul tu,” ku Manyin.

    “Berindik ari nya, RM1 bilion udah diagih ngagai kitai lalu penyampau tu udah dikemendar dalam bajet lalu aku beterima kasih ngagai perintah besai udah meri kitai RM1 bilion ungkup taun baru enggau taun udah nya.”

    Ku Manyin, RM1 bilion deka dikena ngemanahka infrastruktur ba sekula tuai.

    “Kami mega bisi madah ngagai Kepala Menteri ke alai kami enggai ngaga baru tauka ngemanahka sekula mit di sekeda kandang menua, kelebih agi di kandang menua pesisir. Kami nyangka deka nutup sekula mit tu.

    “Kami udah berandau enggau semua bala pengari rayat sereta mega kaban kunsil nengeri enggau apai indai, tebal agi sida besetuju nutup sekula mit lalu dipegulai nyadi siti sekula besai. Berengkah ari taun baru, kami deka bisi siti sekula besai ungkup siti sitak menua pesisir,” ku iya nambah.

    Rambau gempuru besai nya, sekeda orang ti landik nyengkaum ari Semenanjung Malaysida meri licha peransang ti nyelinting pekara strategi nyadi ketuai sereta pekara bukai bepelasarka bidang sida empu.

    “Nya alai, kami ngarap nengah gempuru besai tu mayuh bala pengajar deka bisi penemu baru sereta ngarapka sida deka pulai lalu bejalaika semua penemu tu,” ku iya.

    Lalu pekara udah tu ti diperambu kami iya nya kami deka ngelatih bala pematih. Reti iya, tetiap pelilih menua, kami nguji ngelala sapa bagi pengajar ti ulih dilatih nyadi pematih ba subjek teras nyengkaum Jaku Malaysia, Jaku English, Matematik enggau Sains, ku Manyin.

    “Bala pengajar tu deka ngulu kus diatur kami lalu pengudah nya, sida deka pulai ngagai sekula sida empu di pelilih menua nyadi pematih. Kami semina nembuka pengawa ti dipejalaika perintah besai sereta nadai dikaul dalam polisi.

    “Kami bisi juluk ngatur mayuh agi program dikena ngangkatka pemanah chara ngajar ngagai bala pengajar kitai sereta ngangkatka penyulut penyapai sekula di Sarawak,” ku iya nampung.

    Sama bisi datai Sekretari Mendam Opis Menteri Pelajar, Sains enggau Pansik Teknologi, Datu Sudarsono Osman. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads