Kes beleman mali ti majak nyadi balat ngirauka ati, ku Fatimah - Berita Iban Online

Header Ads

  • Baru Nyadi

    Kes beleman mali ti majak nyadi balat ngirauka ati, ku Fatimah

    Dato Sri Fatimah Abdullah
    Tebal agi kes nya nyadi ba anak mit enggau orang indu ti enda tau enda diputarka enggau lengkas.

    KUCHING: Penyampau kes beleman mali ti majak nyadi ba mensia mayuh di nengeri tu balat ngirauka ati.

    Menteri Pengelantang Pendiau, Orang Indu, Komuniti, Ruang Bilik enggau Pemansang Anak Mit, Dato Sri Fatimah Abdullah madah, tebal agi penanggul bekaul enggau beleman mali enggau masung nya nyadi ba anak mit enggau orang indu ti enda tau enda di putarka.

    Dalam taun 2014, Sarawak ngerikod 14 iti kes, 2015 (21 iti kes), 2016 (13 kes) lalu dalam bulan Oktober 2017 (18 kes), ku iya.

    “Opis Kunsil Pemansang Pengawa Rama Sarawak (MPS) begulai enggau PDRM sereta Opis Pengelantang Pendiau (JKMS) dalam proses ngaga data profil orang ti dituntung penanggul tu enggau orang ke ngereja pengawa salah beleman mali tauka masung nya, mansik kebuah kes tu nyadi, sebedau ngatur woksyop ke disadang deka diatur taun baru tu ila,” ku Fatimah.

    Iya madah munyi nya lebuh nyimpul jurai ba hari ke-6 Aum Kunsil Nengeri ditu, kemari.

    Nengah awak nya mega, Fatimah nyaut tanya ari ADUN Batu Kitang, Lo Khere Chiang  ti naya sekalika pelajar seksual bisi diajar di sekula tauka nadai.

    “Ku YB Batu Kitang nya, pelajar seksual diajar di sekula tang sebagi ari Pengerai Reproduktif.

    “Kelimpah ari nya mayuh macham inisiatif dipejalaika Opis Pengerai, LPPKN, opis menteri kami enggau NGO, meri penemu sereta kompetensi  pasal pelajar seksual di Sarawak.

    “Kelimpah ari undang-undang mega bisi ‘Kanun Keseksaan dan Akta Kanak-kanak’ ke nyaga sesiku orang napi penusah ari sukut seksual, lalu siti agi undang-undang ke silik agi, iya nya ‘Akta Kesalahan Seksual Terhadap Kanak-kanak 2017 (Akta 792)’ udah berengkah dikena kenyau ari 10 Julai 2017 ti ngemerat nyaga anak mit/nembiak ke berumur 18 taun ke baruh ari nyadi dituntung pengawa salah seksual nengah skop ukum ke berat agi ba sida ke ngaga penyalah nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads