KIR ke deka minta PPRT dipinta nganjung nama ke Opis Pelilih - Berita Iban Online

Header Ads

  • Baru Nyadi

    KIR ke deka minta PPRT dipinta nganjung nama ke Opis Pelilih

    AUM PENGARANG BERITA: (tengah) Fatimah dalam aum pengarang berita nesau peranak Malaysia di nengeri tu ke bisi direjista dalam e-kasih ke minta bantu nengah program PPRT 2018 patut ngenataika lengkas peminta nya sebedau ujung bulan tu.
    KUCHING: Ketuai Ruang Bilik (KIR) ke bisi direjista dalam e-Kasih ke deka minta bantu Program Perumahan Rakyat Termiskin (PPRT) ungkup taun 2018 dilalau nganjung nama diri ngagai Opis Pelilih di kandan menua sida sebedau 31 November tu.

    Menteri Pengintu Pengelantang Pendiau, Pengelantang Raban Bansa, Orang indu enggau Pemansang Nembiak Mit, Dato Sri Fatimah Abdullah madahka, nya ngambika ulih nentuka penyampau peminta agih belanja ungkup PPRT nya ngagai Opis Menteri Pemansang Menua Pesisir enggau Kandang Menua (KKLW).

    Nitihku Fatimah, bantu belanja program PPRT diungkupka KKLW nengah Opis Menteri Betanam Betupi Moden, Tanah Adat enggau Pemansang Kandang Mengeri ke udah nya diserahka ngagai opis pelilih menua.

    “Peranak Malaysia di nengeri tu ke berejista dalam e-kasih ke deka minta bantu PPRT ba taun 2018 dilalau ngenataika peminta nya ngagai opis pelilih menua sebdau tauka kena 31 November 2018.

    “Kitai minta rintai nama tu ngambika kitai nemu penyampau belanja ke patut dipinta ngagai KKLW dikena bejalaika program tu taun baru.

    “Syarat iya enda tau enda bisi tanah diri empu,” ku iya dalam aum pengarang berita Mesyuarat Focus Group Pembasmian Kemiskinan Negeri Sarawak Bil.5/2017 ke diatur ba Tingkat 2 Wisma Bapa Malaysia ditu, lemai kemari.

    Dulu ari nya Fatimah nyadi chairperson Mesyuarat Focus Group Pembasmian Kemiskinan Negeri Sarawak Bil.5/2017 iya ti kepenudi ungkup taun 2017 ti sama bisi digulu pengari ari beberapa opis menteri, opis sereta ejensi ti bekaul.

    “Program PPRT mega bisi dipejalaika taun 2016 ke alai bisi 4,591 buah rumah tauka KIR ke dibantu lalu ba taun tu naka bulan November bisi 5,271 KIR ke dibantu lalu penyampau tu mega ngelui ari ke dijuluk kami,” ku iya.

     Kelimpah ari nya lebuh ke ngenang pasal aum nya kemari, Fatimah madahka tuju aum nya dikena nemu penerang pemadu baru pasal pengawa ngatur enggau pejalai ‘Program Pembasmian Kemiskinan dan Kesejahteraan Rakyat Negeri Sarawak’ ke udah diperambu pun taun tu sereta dipejalaika nyentuk bulan tu.

    Ku iya, program ke diperambu sereta dipejalaika nya dipatau tauka dikemataka nengah sistem bank data penyeranta e-Kasih sereta bantu ti diberi dikena ngeluarka ari penyeranta baka program 1AZAM enggau program bukai ke diatur ejensi bukai dikena ngangkatka pengelantang rayat.

    Sama bisi dalam aum pengarang berita nya kemari Sekretari Mendam Opis Menteri Pengintu Pengelantang Pendiau, Pengelantang Raban Bansa, Orang Indu enggau Pemansang Nembiak Mit Dr. Saadiah Abdul Samat sereta Sapit Pegawai Kemajuan Negeri Hamdiah Ismail enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads