Komuniti Orang Ulu seruran nyukung KM dalam ngemansangka ekonomi - Berita Iban Online

Header Ads

  • Baru Nyadi

    Komuniti Orang Ulu seruran nyukung KM dalam ngemansangka ekonomi

    TEPA : Dennis (lima kiba) enggau Antonio nyuaka tawak nyadi tepa dikena masa Abang Johari (enem kiba).
    MIRI: Komuniti Orang Ulu ditu terus ngayanka sukung sida ngagai Kepala Menteri (KM) Datuk Patinggi Abang Johari Tun Openg ba juluk enggau pengawa iya ngubah Sarawak nyapai tikas ekonomi bepenatai pemisi tinggi datai ba taun 2030 sereta nentuka tetiap komuniti di nenegri tu deka nerima enggau ngasaika pemansang.

    Mandal Presiden Gerempung Serakup Orang Ulu Sarawak, Malaysia (Forum) Dennis Ngau ke mega Kaban Kunsil Nengeri (ADUN) Telang Usan madah berindik ari Abang Johari ke diatu nampung pengawa ex-Kepala Menteri iya nya niang Tok Nan, komuniti Orang Ulu berasai lantang sereta pechaya nengeri tu dalam pegai kuasa ti likun.

    “Abang Johari siku ketuai ti bepeneleba, lalu ngembuan mayuh penemu ti diulih semanjai timpuh kereja politik iya, pekara tu mih ti diguna kena nyadi ketuai ti menyana.

    “Ditambah enggau sukung tegap ari tiga sapit kepala menteri ti dikeandalka iya enggau pengeran sereta komitmen tim kabinet, endang enda sanggu madahka nengeri tu deka mansang ngagai jeman ke baru.

    “Kami andal amat ba pengawa nyirika Abang Johari, iya nyadi kepala menteri ti chukup dipebasa laban nyadi orang ti patut mai nengeri kitai ngagai tikas tinggi dalam pemansang ba ekonomi enggau rampa menua,” ku Dennis madah ba mua lebih 1, 000 iku temuai dipebasa rambau Pengerami Makai Lemai diatur Forum di sebuah hotel ditu, apin lama ke udah.

    Pengerami ti berambaika jaku ‘Makai Selamat Abang Johari Dipadu Mangku Pengawa’ diatur kena ngerami enggau ngelaluka Abang Johari nyadi Kepala Menteri Sarawak ti Keenam.

    Dennis nandu baru ngagai Abang Johari ke alai Forum deka nyadi payung ba penyerakup pupu etnik komuniti Orang Ulu di nengeri tu, lalu seruran deka bediri tegap nyukung iya.

    “Kami deka naka ulih nentuka juluk enggau pengawa Kepala Menteri ti inginka Sarawak nyadi nengeri bepenatai pemisi tinggi deka disukung bala komuniti kami di pasar, mengeri enggau peranak kami ke diau di rumah panjai, di serata Baram, Lawas, Belaga, Limbang, enggau ke bukai,” ku Dennis.

    Dennis nyemetak madah ke alai Sarawak benasit endar bisi ketuai ti bepenau enggau runding ke bansa nya sereta nitihka singkang kemaya hari dalam enggau luar dunya, pekara ti besai sereta beguna endar kualiti ti dipinta ubah dunya kemaya hari.

    “Kitai berasai gagit enggau pekara ti deka nyadi ba nengeri kitai dudi hari.

    “Kami, komuniti Orang Ulu deka nyadi sebagi ari perambu nuan lalu ngarap ulih gawa ba pemujur nengeri, enggau agenda pemansang strategic nuan ti ngemeratka ekonomi digital sereta polisi ke bukai ti udah dipejalaika nuan kenyau ari nuan nyilih pangku pengawa ngetuai nengeri tu, beberapa bulan ke udah,” ku iya nambah.

    Bini Abang Johari Datin Patinggi Datuk Juma’ani Tuanku Bujang, Sapit Kepala Menteri Datuk Amar Awang Tengah Ali Hasan, Sapit Speaker Aum Kunsil Nengeri (DUN) Dato Gerawat Gala, Menteru Muda Dagang Temuai, Seni enggau Main Asal Datuk Lee Kim Shin, Menteri Muda Kaunsil Kandang Menua Datuk Dr Penguang Manggil, Menteri Muda Orang Indu, Ruang Bilik enggau Pemansang Anak Mit Rosey Yunus, Datuk Bandaraya Miri Adam Yii, Kabvan Senat Senator Datuk Lihan Jok, ADUN Piasau Datuk Sebastian Ting, Kabna Parlimen (MP) Baram Anyi Ngau, Chairman Pengatur Dennis Ngau ke mega ADUN Telang Usan, ADUN Lambir Ripin Lamat, ADUN Murum Kennedy Chukpai Ugon, ADUN Kabong Mohd Che Kadir, Presiden Forum Antonio Khati Galis, Sekretari Politik Kepala Menteri Charles Balan Seling sereta Residen Miri Sherina Hussaini antara bala ke bisi datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads