Konsert ngumpul belanja PIBG SMK Dato Permaisuri nerima sukung chukup manah - Berita Iban Online

Header Ads

  • Baru Nyadi

    Konsert ngumpul belanja PIBG SMK Dato Permaisuri nerima sukung chukup manah

    BEPERINDANG: Adam Yii (dua kanan), Haslinda (dua kiri) enggau Ismail Izzani bela beperindang ba atas panggau DP Got Talent.
    MIRI: Konsert ngumpul belanja Gerempung Apai Indai enggau Pengajar (PIBG) SMK Dato Permaisuri ke diatur ba Dewan Suarah Miri kena malam Hari Empat ke udah nerima sukung ke chukup manah.

    Prinsipal SMK Dato Permaisuri Haslinda Jedi madah, tikit dikena ngemataka konsert DP Got Talent keterubah iya diatur nya abis dijual.

    “Bisi 1,000 tikit disedia lalu abis dijual nyadi nya ukai semina nerima sukung ari piak sekula aja tang mega ari bala nembiak ke besemak enggau sekula tu.

    “Kitai meri terima kasih ngagi sukung enggau kerejasama ke udah dipandangka dikena ngemujurka konsert ngumpul belanja tu,” ku iya madah nengah jaku pengelalu iya.

    Nitihku Haslinda, entara objektif ngatur konsert tu iya nya dikena nambahka belanja PIBG ungkup ngatur bemacham aktiviti sekula.

    Kelimpah nya ku iya, belanja nya deka dikena ngemanahka perengka guna sekula enggau ngintu pengelantang pendiau nembiak ke kurang benasit ari sukut bantu besekula.

    “Pia mega, konsert tu ulih nyadi pelasar dikena ngiga nembiak ke ngembuan pengelandik sreta mantu ngangkatka pemerani sida ngerembaika penau diri,” ku iya.

    Tu mega entara projek transformasyen sekula ke begunaka piak sekula besaup enggau PIBG sereta komuniti besemak.

    Sama bisi datai ngerichaha pengerami tu Datuk Bandar Kaunsil Mengeri Besai Miri, Adam Yii.

    Konsert ngumpul belanja nya dikemujurka Ahmad Fua’ad Yahya ke nyadi Direktor Konsert disaup sapit iya Valentine Donny Umpeng, sereta Ketuai Pengintu Jurutari Fatin Hazirah, ke mega dibantu NATZ Production.

    Berengkah ari pukul 7 ngagai 10 malam mayuh aktiviti beperindang nyengkaum diperindang artis ari menua tu, mandangka fesyen, drama sereta enchabut tikit benasit.

    Program nya dirichahka enggau penatai artis Miri City Idol dibaruh  Natz Production iya nya Nicole Emily Johnny, Nur Amirah Zulkifler, Nur Syuhadah Afiqah, Elvin George Abel enggau Muhammad Fathurrahim Rosdi.

    Pengerami nya ditutup enggau pengawa mandangka tanda flashmob ari raban pengajar enggau nembiak sekula ke diring enggau live band Kugiran. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads