Mawan enda bediri di Saratok maya PRU14, ku Tiong - Berita Iban Online

Header Ads

  • Baru Nyadi

    Mawan enda bediri di Saratok maya PRU14, ku Tiong

    Datuk Seri Tiong King Sing
    KUCHING: Presiden Parti Demokratik Progresif (PDP) Datuk Seri Tiong King Sing madah pemangku penuduk Parlimen Saratok Tan Sri William Mawan Ikom enda deka ngenanka penuduk nya ba Pengawa Bepilih Besai Ke-14 (PRU14).

    Bejaku ngagai pemberita pengudah pengerami ngemun nama enggau logo baru parti nya malam ensanus, iya madah nyentuk ngagai diatu Mawan bedau ngerejista diri nyadi kaban PDP.

    Mawan ke nadai beparti pengudah ngelengkaka diri ari PDP tauka ke dulu agi ari tu dikelala nengah nama Parti Demokratik Progresif Sarawak (SPDP) udah numbuhka Parti Tenaga Rakyat Sarawak (TERAS).

    Tang Mawan sekali agi ningkilka diri ari parti nya ngambi ulih meri awak ngagai iya bediri nyadi chalun terus BN ba Pengawa Bepilih Nengeri Ke-11 taun 2016.

    “Ungkup sitak Parlimen Saratok, nya penuduk kitai. Sentang Mawan, pemutus dilempaika ba ketuai Renggat Tinggi PDP,” ku iya seraya madah ketuai renggat tinggi udah ngaga aum kemari tang nadai nerima peminta ari Mawan ke deka nyereta parti.

    “Sekalika aku nganti iya tauka iya nganti aku (ungkup peminta nyadi kaban parti), enti iya mat keran, kenataika peminta nyereta parti,” ku Tiong.

    Iya ke mega MP Bintulu nambah, PDP deka nyabung chalun parti di semua empat penuduk ke diungkup ngagai PDP.

    Ku iya, PDP udah bisi chalun ke manah ungkup parlimen Saratok, enda ngira sekalika Mawan ngenataika pinta nyereta parti tauka enda.

    “Diatu kitai udah bisi sekeda nama chalun ke manah ke alai kitai pechaya ulih menang ba empat penuduk nya,”ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads