Mengeri Kuching lama deka diangkat nyadi pesaka, ku Abang Jo - Berita Iban Online

Header Ads

  • Baru Nyadi

    Mengeri Kuching lama deka diangkat nyadi pesaka, ku Abang Jo

    Datuk Patinggi Abang Johari Tun Openg
    KUCHING: Perintah Negeri deka ngangkatka semua fasiliti ngelingi Mengeri Kuching lama lalu diangkat nyadi Pesaka Kuching Lama.

    Ungkup tuju nya, Kepala Menteri Datuk Patinggi Abang Johari Tun Openg udah ngemendar agih belanja RM15 juta dikena ngias kandang ngelingi Waterfront Kuching.

    “Kitai semua nemu Kuching chukup manah dipeda, diatu kitai bisi produk baru iya nya Jematan Darul hana ti tau matak temuai kelebih agi maya malam hari.

    “Ba sepiak bukai, kitai deka ngaga baru Jematan Gantung Satok ketegal jematan nya sebengkah pesaka ungkup kitai di Sarawak.

    “Kitai mega deka ngemanah Kubu Margherita lalu deka disikap enggau palan endur makai bepelasarka konsep taman dalam kubu.

    “Semua fasiliti ke disedia perintah sigi dikena ngangkatka Kuching nyadi mengeri ke ditapat temuai ari dalam enggau luar,’ku iya.

    Iya mansutka jaku nya ba pengerami malam Anugerah Dagang Temuai Hornbill Sarawak Ke-7 di sebuah hotel ditu, kemari.

    Abang Johari nambah, perintah deka seruran ngangkatmanah fasiliti kelebih agi ke bisi kaul enggau industri dagang temuai di nengeri tu.

    Tang ku iya, semua atur matak temuai datai dilempaika ba orang tauka kompeni ke ba industri nya.

    “Kitai bela nemu diatu kitai benung ngaga Kampus Muzium Baru lalu ketegal nya Datuk Abdul Karim Rahman Hamzah (Menteri Dagang Temuai, Seni, Main Asal, Nembiak enggau Lumba) diatu di Vienna, Austria ngambika ulih mai pulai semua artifak Borneo ke Kuching.

    “Kitai mega deka ngulihka artifak sejarah kelebih agi ke bekaul enggau Alfred Wales ke alai kitai deka ngaga Palan Alfred Wales di Santubong .

    “Berindik enggau nya, orang ti bisi pengerindu ba sejarah tau datai ke Sarawak lalu ulih nemu pekara ke nyadi ba jeman Darwin,”ku iya.

    Ba pengerami nya, Abang Johari ngelalau orang ba industri dagang temuai nengeri tu ngubah chara sida ngadu dagang kelebih agi ba atur ngelaku Sarawak.

    Sarawak ku iya kaya enggau main asal, pengeraja asal ke ulih dikemansang nengah bemacham chara kelebih agi ari sukut promosyen nengah teknologi digital.

    “Aku udah ngemunka polisi baru di Sarawak ke alai teknologi nyadi pekara ke berat ba pemansang ekonomi ungkup semua sektor nyengkaum dagang temuai.

    “Aku pechaya industri tu ulih mujur jemah ila lalu aku ke nyadi kepala menteri deka seruran nyukung semua pengawa ke tau ngangkatka industri dagang temuai,”ku iya.

    Bela datai Menteri Muda Dagang Temuai, Seni, main Asal, Nembiak enggau Lumba Datuk Lee Kim Shin enggau Sekretari Mendam Opis Menteri Datu Ik Pahon Joyik. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads