MIDA deka ransing matak pemeranak puku ke Sarawak - Berita Iban Online

Header Ads

  • Baru Nyadi

    MIDA deka ransing matak pemeranak puku ke Sarawak

    NERANG: Naroden (tengah) begulai enggau Rajendran sereta Mark mantaika penerang ngagai raban pemberita di Kuching, kemari.
    KUCHING: Kaunsil Pemansang Pemeranak Puku Malaysia (MIDA) deka matak pemeranak puku enggau industri berat ke Sarawak ti enggau penyampau puku diperanakka lebih RM17 bilion.

    Menteri Muda Pemansang Dagang Mit enggau Tengan Pemesai (PKS) enggau Orang Dagang, Datuk Mohd Naroden Majais madahka perintah chukup ransing nentuka pemujur pekara tu.

    Nya alai ku iya Sarawak seruran nyikap diri dalama pengawa nyendiaka pemansang infrastruktur dikena napi peminta guna pemeranak puku menua luar enggau menua tu empu.

    “Naka ke diatu, kitai benung proses pemansang infrastruktur nyengkaum dalam sektor teknologi pemandah enggau penyambung (ICT),” ku iya.

    Naroden mansutka pekara nya lebuh dikerandau pengudah bejadika Aum Pejalai Bekalan Malaysia Timur ba sebengkah hotel ditu, ensanus.

    Sama bisi datai, Sapit Ketuai Pemesai Eksekutif MIDA, Datuk N. Rajendran, Ketuai Pemesai Eksekutif RECODA, Tan Sri Datuk Amar Wilson Baya Dandot enggau Ketuai Pemesai Eksekutif General Electric (GE), Datuk Mark Rosario.

    Taja pia ku Noroden penyikap bekaul enggau pengereja pengawa Sarawak bedau chukup.

    “Enti kitai ngenang pasal pengawa nyendiaka infrastruktur, perintah seruran besedia sereta dalam proses ngemansangka (infrastruktur).

    “Tang enti bekaul enggau pengereja pengawa, agi bedau chukup dikena napi peminta guna indutri ke majak nambah,” ku iya.

    Kelimpah ari nya, Rajendran madahka Sarawak entara empat palan pemeranak puku pemadu besai di Malaysia nangkanka Johor, Selangor enggau Peulau Pinang.

    Iya ti enda ngenang silik pasal pemeranak puku baru nya, iya madahka nya mungkur industri berat nyengkaum keluli enggau kacha.

    Enggau penatai pemeranak puku nya iya arap bendar nya deka muka mayuh agi peluang dagang ngagai kompeni menua tu ngena chara nyendiaka bekal barang mata, kompena, kereban enggau servis.

    Nya mega seraya mai kompeni multinasional enggau menua tu empu nyereta PKS sama enggau pejalai dikena numbuhka kaul bekal ti tegap ti kandang menua tu.

    Dalam program nya, digulu lebih 300 iku delegit ari kompeni enggau organisasyen multinasional enggau PKS ba sektor perintah enggau peribit. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads