Nama reti semua mosyen pasal Sempekat Malaysia 1963? - Berita Iban Online

Header Ads

  • Baru Nyadi

    Nama reti semua mosyen pasal Sempekat Malaysia 1963?

    JURAI DISEDIA: Sapit Kepala Menteri Datuk Amar Douglas Uggah Embas (kanan) begulai enggau Kepala Menteri Datuk Patinggi Abang Johari Tun Openg (tengah) meresa teks 2018 ti deka dipejuraika ba Aum Kunsil Nengeri Keterubah Penggal Kedua ba Hari Ketrubah ba Kompleks DUN ditu apin lama udah. Bela Dipeda dalam gambar Ketuai Sekretari Peribit Kepala Menteri Wan Khalik Wan Muhammad (kiba).
    KUCHING: Mosyen MA63 udah dibantaika Sapit Kepala Menteri enggau Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas kena Hari Satu, 8 Oktober, 2017.

    Mosyen tu seriris enggau pekara ti udah disebut Menteri Besai Datuk Patinggi Najib Tun Abdul Razak, maya Hari Malaysia, 16 September 2017 di Kota Kinabalu, ti nyamin hak Sabah enggau Sarawak deka terus diintu.

    Tu seriris enggau Mosyen dikemendarka DUN kena 7 Disember, 2015, tu dikena meri pengarap ngagai perintah nengeri ngambi semua pengawa ti patut ari baruh Pekara VIII MA nentuka pejalai perambu ti udah bisi dalam Inter-Governmental Committee Report (IGC Report), tuju iya nyaga pemerat khas Sarawak enggau perintah nengeri udah bejaga dikena bejalaika Raban Penerit Konsitusional enggau pengawa ngintu ti diberi ngagai menua, nyengkaum ngenegapka Ordinan Mekal Gis 2016, dipegulaika PETROS ngambika chakah ngaul diri dalam industri minyak enggau gis di Sarawak, nyediaka pansik ba pekara wang di baruh Artikel 112D Konstitusyen Perintah Besai; nganjung peminta duti setem dipinta ba instrumen atur pengawa tanah enggau ubah ngagai Akta Garis Entara Tasik, 2012 sereta ngulihka dokumen sejarah ti relevan ari Arkib Menua British dikena nyukung penuduk perintah nengeri senentang isu tu.

    Nya alai, iya dipindah ke Dewan ditu mutuska:-

    Dewan tu meri pengarap ngagai perintah nengeri numbuhka raban bejalaika pengawa khas tikas tinggi ti berunding enggau Perintah Besai mutarka semua isu bekaul enggau pengangkun sereta ngetanka Pekara Dijaga enggau pengelebih hak ti diberi ngagai Perintah Nengeri Sarawak nitihka atur enggau penaluk MA63 ari baruh tu:

    1. Ngintu Hak Sarawak

    Kena 16 September, 2017, di Kota Kinabalu, Sabah, Menteri Besai Datuk Patinggi Mohd Najib Bin Tun Abdul Razak sekali agi nyamin Sabah enggau Sarawak ke alai sida deka diberi hak baka ti ditetapka dalam MA63.

    Jamin tu ukai semina retorik politik aja. Perintah Besai udah timbal positif ngagai inisiatif Sarawak minta pulai baru hak kitai di baruh MA. Dewan udah diterang pasal pekara dijapai ba pengawa berunding enggau Perintah Besai ari niang Pehin Sri Adenan Satem dalam simpul jaku dipansutka niang kena 30 November 2016.

    Tu mega ulih diperati ba Sarawak dikelaung ari Undang- Undang Mekal Gis enggau hak mukat ba semua lisin pengawa berikan tasik dalam kandang Zon Ekonomi Ekslusif Nengeri (EEZ). Semua atur pejalai tu ba premis enggau ngenuku hak Nengeri ba Continental Shelfbegulai enggau pemansut minyak enggau gis sereta marin.

    Nya alai, kami ngenang pemanah jasa ngagai Menteri Besai laban pemereti ati iya enggau sedia berundingka apil kitai ngambi mulai Hak Sarawak.

    Ripot IGC pengawa nyaga ungkup Sarawak enggau Sabah nyadi sebagi ari MA sereta udah dipasuk ke dalam Perintah Besai. Ba pekara dijaga enda dipasuk dalam Konstitusyen, Artikel VIII MA ngungkup ke alai tu deka dipejalai nengah eksekutif, undang-undang enggau ke bukai ari Perintah Besai sereta Perintah Nengeri Sabah enggau Sarawak.

    Dalam bulan Disember 2015, Dewan udah ngemendarka Mosyen dibantaika Menteri Kanan Tan Sri Datuk Amar Dr James Jemut Masing meri mandat ngagai perintah nengeri bejalaika semua pengawa ti patut di baruh Artikel VIII MA ngambi nembuka pejalai semua perambu dalam Ripot IGCsereta ngintu peminta khas nengeri enggau peranak iya.

    2.Pengawa Dipejalaika Perintah Nengeri

    Pengudah Mosyen, perintah nengeri udah bejalaika pengawa dikena nyapai tuju ti disebut di dalam iya. Taja sempekat udah dijapai ba sekeda isu enggau diputar nengah atur pengawa, sekeda isu besai Konstitusyen enggau pekara wang apin ulih diputar enggau meruan, aku deka ngelansa bagi ke penudi jaku aku.

    Dikena ngenegapka penuduk Nengeri bekaul enggau isu ti apin teputar tu, Perintah Nengeri ngasaika beguna endar ngempung semua bukti dokumen nentuka Nengeri tu bisi penuduk undang-undang tegap ngemuntangka pengawa berunding enggau Perintah Besai.

    Ba pekara tu, begunaka endar meda salin asal dokumen tu. Tu semina ulih diambi di Arkib Menua British. Kami udah bulih, ngenetap sereta ngenukuka salin dokumen beguna tu. Nya kebuah, seraban tim diketuaika Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali udah dianjung ke London ba pejalai besai tu. Nadai penangi agi Nengeri kitai diatu penuduk berunding tegap agi berindik ari pengawa ngambi pulai enggau ngenukuka pemisi dokumen ti bekaul.

    3. Garis Entara Menua Sarawak

    ‘Sarawak (Alteration of Boundaries) Order in Council, 1954’ ngemesaika garis entara menua ngambi dipasuk dalam kandang Continental Shelf nyadi dasar tasik enggau baruh tanah ti di baruh tasik tinggi besepiak enggau kandang tasik Pelilih Sarawak. Perintah British dalam penerang rasmi iya (diatu Arkib Menua British) meri penerang baka di baruh:-

    “Hak sebuah menua tebing tasik dikena minta kuasa ba dalam tasik enggau tanah baruh besepiak enggau tebing tasik ngambika dipantau ba guna pemansut menua di dalam iya udah dikeluar apin lama ke udah dalam pengemeran antarabansa.

    Nya kebuah, garis entara menua Borneo Utara, Sarawak enggau Brunei udah dikemesai di baruh provisyen Borneo Utara (Alteration of Boundaries) Order in Council, 1954; Sarawak (Alteration of Boundaries) Order in Council, 1954 Brunei Proclamationngambi ngemendarka perintah wilayah tu bejalaika bidang kuasa ba guna pemansut asal menua ari benua besepiak enggau tebing tasik sida. Status Tasik Besai di atas rak benua ti enda kena empas.”

    Nya alai, baka garis entara menua Sarawak ti udah nyata disebut rambau Hari Malaysia di baruh Sarawak (Alteration of Boundaries) Order in Council, 1954.

    Tu garis entara menua Sarawak baka ba Hari Malaysia.

    Garis entara menua nengeri enggau integriti kandang menua iya dijaga 1(3) enggau 2 (b) Perintah Besai. Britain netapka garis entara menua Sarawak ngambika nyaga hak Nengeri ba semua pemansut asal, nyengkaum minyak enggau gis asli dalam Continental Shelf.

    Garis entara menua enggau wilayah nengeri enda ulih diubah, belalauka Artikel 2 (b) Konstitusyen Perintah Besai, enggau nadai pemendar Nengeri nya dibantaika ari undang-undang ti dikemendarka Besai.

    4. Hak Ngelumbung  Minyak.

    Perintah Sarawak udah diberi konsesyen minyak enggau monopoli ngelumbungungkup petroleum kenyau ari jeman Rajah. Kar, ditaruh di Arkib Menua British ti dilangkar dalam taun 1930an, ngelai sereta ngelala kandang dalam tasik enggau baruh tanah, ke diatu nyadi Continental Shelfti udah dipasuk ke dalam minyak ti dikeluarka nengeri ngambika diserungkai.

    Pekara ti diaku, rambau perintah dipegai Rajah, Sarawak udah bejalaika bidang kuasa ba pengawa nyerungkai enggau minyak tauka petroleum di kandang luar tebing tasik Nengeri.

    Dewan udah ngemendarka Ordinan Ngelumbung Minyak  1958 dikena ngemata pengawa minyakminyak dalam enggau ba Continental Shelf, Sarawak. Ordinan tu nadai kala dikinsil taja lebuh undang-undang darurat dipejalai.

    Pengudah Ditukuka Menua Charut dalam taun 1969 (Indu Kuasa ) Ordinan No.7 enggau 10 ditukuka arii baruh Artikel 150 (2) Konstitusyen Perintah Besai ti bela mai empas ba tatak kandang tasik kandang nengeri enggau natak garis entara menua nengeri semina 3 batu nautika ari garis tebing tasik iya, lalu ngemesaika Continental Shelf Act 1966 enggau Undang- Undang Ngelumbung Petroleum1966 ngagai Sarawak.

    Akta Perintah Besai tu ngasuh Perintah Besai ulih bejalaika bidang kuasa ba Continental Shelf di nengeri tu sereta nyaga guna petroleum dalam Continental Shelf.

    Pemadah Menua Charut ba taun 1969 udah dikinsil Dewan Parlimen dalam bulan Disember 2011 nitihka artikel 150 (7) Konstitusyen Perintah Besai, pia ku Ordinan Darurat ti udah diterit sereta madahka Akta nya ngagai Sarawak ari Emergency (Essential Powers) Ordinance, No. 10, 1969 mega badu agi diteritka.

     Opis Bekuasa Konstitusyen ba pengawa ngeluar nyerungkai minyak tauka lisin ngulihka minyak enggau monopoli ngelumbung terus ngelempaika hak ngagai Perintah Nengeri di baruh Pekara 2 (c) Rintai Menua ba Tusun Kesembilan Konstitusyen Perintah Besai sereta Ordinan Ngelumbung Minyak, 1958.

    Dalam taun 1970, bida antara perintah nengeri enggau Perintah Besai ba pekara hak bekaul enggau hak minyak enggau gis luar tebing tasik Sarawak udah diputar ba pemerat nasional “enda ngira penuduk Konstitusyen enggau undang-undang” lalu saman sivil ari Nengeri ngelaban Perintah Besai dalam pekara tu dikinsil ngambika Undang -Undang Pemansang Petroleum1974 ulih dikemendarka.

    Ari baruh akta tu, pengempu enggau hak petroleum bepanggai ba Petronas ba bayar royalti 5 peratus ngagai Sarawak, ti dikumbai bayar pampas ba pengawa ngambi reta diempu nengeri, petroleum (enggau gis) – ti nyengala diterima Perintah Besai ngagai nengeri pengempu pemansut asal di atas garis entara menua nengeri datai ngagai continental shelf baka ti ditetapka Perintah Dalam Kaunsil.

    Sarawak, nyadi pemungkal enggau kaban Gerempung, seruran gawaka peminta/pemerat Malaysia. Sarawak endang bebendar sereta meri awak dalam peminta nasional, meri Petronas megai enggau teulihka penguntung ari petroleum enggau pemansut asal iya dalam Continental Shelf sereta mega ba atas tanah.

    Nya kebuah, Petronas ulih meri hak tauka konsensyen ungkup pengawa nyerungkai, ngemansang enggau ngeluarka minyak enggau gis dalam Continental Shelf, ngagai mayuh kompeni baka Petronas Carigali, Nippon Oil, Shell, Murphy Oil, Mubadala Oil and Gas, Total sereta ke bukai.

    Kompeni Sarawak apin ngaul diri ba sebarang pengawa pemansang enggau ngeluar minyak enggau gis dalam Continental Shelf.

    Perintah Sarawak, chukup beratka peminta rayat, udah nentuka peranak Sarawak bisi peluang chakah ngaul diri dalam kededua pekara, ulu sungai, kandang tengah sungai enggau ili sungai dalam industri minyak enggau gis di nengeri tu.

    Mayuh peranak Sarawak enggau kompeni Sarawak kemaya hari, bisi pengelandik, peneleba enggau pemansut belanja ngambika ngaul diri tauka beranakka puku dalam industri minyak enggau gis.

    Nya kebuah, Perintah Nengeri udah mantaika Ordinan Mekal Gis, Dewan, lalu numbuhka Petros seriris enggau pengawa perintah nengeri sedia nempa kaul ba semua pekara industri minyak enggau gis.

    Komiti Petros datai ari raban ti mayuh peneleba dalam industri minyak enggau gis.

    5. Bala Pemain Industri Minyak di Sarawak Nitihka Undang-Undang Nengeri.

    Perintah nengeri dekaka semua raban ti ngaul diri dalam pengawa nyerungkai enggau ngeluarka minyak enggau gis dalam kandang garis entara menua nya, nyengkaum Petronas, ngambi nitihka semua undang-undang nengeri bekaul baka ti udah ditetap Ordinan Ngelumbung Minyak sereta mega Undang-undang Tanah, bekaul enggau pekara ngena tanah nengeri ba aktiviti sida.

    Perintah nengeri nadai kala meri ‘pengecualian’ ngagai Petronas bekaul enggau penerit atur undang-undang Sarawak.

    Nya alai, berindik ari Petronas enggau kunteriktor kunsi pengeluar sida nadai bulih monopoli ngelumbung petroleum nitihka Ordinan Ngelumbung Minyak snadai permit diau di Tanah Nengeri (nyengkaum di kandang Continental Shelf) ari baruh Undang- Undang Tanah Petronas meseti ngemaruka aktiviti sida nitihka undang-undang kitai.

    Perintah nengeri enda deka ngerusakka dagang Petronas tauka pemerat ekonomi di Sarawak tauka ngelanggar pemerat nasional. Tambah mega, Perintah nengeri ba tikas tu, enggai ngena Kort mutarka isu ke baka tu.

    Dalam taun 1970, Perintah nengeri bisi juluk deka mutar memanah ke alai pemerat ba Perintah Besai enggau Nengeri ulih diaku enggau pengawa ngenuku pematut hak Konstitusyen Nengeri di atas Rak Kontinental enggau pemansut asal di dasar tasik enggau baruh tanah di dalam kandang garis entara menua Menu ti bisi komitmen tegap Nengeri ngambi ngemansangka kepentingan menua dalam bejalaika hak ba pemansut asal minyak enggau gis enggau ngeluarka di dalam Nengeri.

    6. Akta Tasik Menua 2012.

    Territorial Sea Act 2012 dikemendar, taja nadai berunding enggau Perintah Nengeri lalu nadai minta pemendar ari Perintah Menua nitih Artikel 2 (b) Konstitusyen Perintah Besai laban undang-undang tu ulih ngubah garis entara menua Sarawak enggau ngurangka ai menua ari 12 ngagai 3 batu nautika.

    Ku Penyata Penerang dalam Rang Undang-undang ti dipansut dalam Parlimen kena bejadika Akta tu, kebuah ngaga undang-undang tu ia nya:-

    (1) Ordinan Darurat (Kuasa-Kuasa Perlu) No. 7 ti ngurangka tatak ai menua ngagai semina 3 batu nautika nadai agi bisi kuasa laban Proklamasi Darurat dibatal ba taun 2011 sebedau Ordinan tu dikena; lalu (2) ngena Konvensyen Pertubuhan Bangsa-Bangsa Bersatu pasal Undang-undang Tasik 1982 ti disain Perintah Sarawak ti nyadi siti piak.

    Kelai Akta tu ti ngachau hak menua ia nya:

    (1) Iya bisi pangka ba ubah garis entara menua Sarawak;

    (2) Iya ka meri kuasa ba dalam tasik enggau tanah baruh tasik ngagai Tuai Pemegai Menua (TYT) (ke nitihka pesan Kabinet Besai Menua);

    (3) Iya natak ai tauka tasik menua gagai 3 batu nautika tang pemesai tasik menua ti dipinta Perintah Besai 12 batu nautika.

    Kar enggau dokumen bukai dalam Arkib Nasional Britain netapka lebuh Sarawak nyadi koloni, ai menua ia udah 12 batu nautika.

    Tatak nya enda patut dikurang pengudah Sarawak megai perintah diri. Taja iya ulih diterima Malaysia bisi kapasiti nunda undang-unndang entarabansa minta kuasa ke pemadu besai atas ai menua ia (enggau tanah menua) kena nyaga pengelikun enggau kuasa ke pemadu besai ba menua, peminta baka nya nundaka undang-undang tauka konvensyen antarabansa enda ulih nyadi kedalih Perintah Besai ngulihka hak ba tanah (nyengkaum Continental Shelf) ti diempu Sarawak nitihka undang-undang.

    Enti enda, Konvensyen enggau Sempekat ulih dikena baka mekanisme dikena ngulihka tanah menua tu enggau enda nitihka Artikel 83 Konstitusyen Perintah Besai, lalu ngubah garis entara menua.

    Pengudah Britain ngawakka Sarawak merintah diri lebuh Hari Malaysia, lalu pemindah kuasa ke atas Koloni Sarawak lebuh nya ngagai Perintah Besai ari Crown British, semua tanah dipenggi Rajah nyadi penggi menua tu lalu ukai diempu Perintah Besai.

    Tu disebut dalam Artikel 47 Konstitusyen Perintah Sarawak. Lebuh Kod Tanah dikemendarka Kunsil Nengeri rambau Perintah Koloni, semua tanah di Sarawak dipegai Crown, lalu geran tanah dipansut nyadi “Lease of Crown Land” (Sewa Tanah Crown) (Peda: Seksyen 12, 13 enggau 21 Land Code 1958 Ed.).

    Reti “Crown” dalam Kod Tanah (1958 ed.) iya nya “Crown dalam hak Perintah Her Majesty (Queen Menua England) di Sarawak”.

    Kod Tanah nya diubah dalam taun 1964 ngambika sebela enggau Artikel 47 Konstitusyen Perintah Sarawak, nyerah semua tanah Crown ngagai menua tu, ngambika nyadi “Tanah Nengeri”. Peminta kuasa ari Perintah Besai enda ulih nyadi kedalih minta hak ngagai dasar tasik enggau tanah baruh dasar tasik (subsoil) dalam Continental Shelf dalam garis entara menua Sarawak, laban Pelantar Benua endang Tanah Crown sebedau Malaysia ditumbuh.

    Pengudah Konstitusyen Menua dikena lebuh Hari Malaysia nunda Seksyen 1 Akta Malaysia 1963, lebuh kuasa Konstitusyen menua diterit, semua tanah baka nya ti suba diempu Crown (Perintah Her Majesty di Sarawak) lalu diempu Perintah Menya nyadi “Tanah Menua”.

    Nya ngelanggar konstitusyen enti Perintah Besai minta hak ba dalam tasik nyadi sebengkah ari tanah Menua, nengah chara minta kuasa ba nya nunda undang-undang antarabansa enggau Akta Entara Tasik 2012.

    7. Perkara Wang.

    Perintah Besai setuju beratika baru pekara wang baka ti dipinta Artikel 112D Konstitusyen Perintah Besai pasal Geran Khas ti patut diberi ngagai Menua tu nitihka Konstitusyen Perintah Besai lalu tauka enda ibuh ditambah tauka diganti pekara penatai pemisi diberi ngagai Menua tu nundaTusun Ke-10 Konstitusyen Perintah Besai.

    Perintah Besai udah setuju peminta menua tu pasal penatai pemisi ti lenyau ari duti import enggau duti eksais ba produk petroleum, peminta ti bisi kaul enggau duti setem ba atur tanah enggau isu wang ke bukai diperunding ba pengawa beratika baru pekara wang nya. Pengawa tu udah lama enda dipejalai. Perintah nengeri diatu benung nyediaka diri ungkup pengawa nya.

    8. Mutarka Isu Ke Tejanggal.

    Perintah Menya meda isu konstitusyen ti beguna endar tu diputar enggau manah, enda ngena undang-undang ngambika enda ngachau penyerakup Perintah Besai dan kaul manah ti bisi entara Perintah Nengeri Sarawak enggau Perintah Besai.

    Udah isu tu ulih diputarka ila, menua Malaysia deka beserakup lalu kaul entara perintah nengeri tu enggau Perintah Besai deka meruan manah.

    Randau entara nengeri tu enggau Perintah Besai patut diatur nunda semangat enggau juluk Sempekat Malaysia sereta Report IGC ti diterima semua raban ti ngujungka penumbuh menua Malaysia ti dikesayau kitai.

    Baka ti disebut nyemetak Dato’ Seri Mohamad Nazri Abdul Aziz, Menteri ba Opis Menteri Besai (maya nya) lebuh iya mantaika Rang Undang-undang Tasik Kandang Menua 2012:

     “Kitai merdeka ba taun 1957, kitai ti nyadi siti unit taja pan bisi sebelas bengkah nengeri. Kitai ti nyadi siti unit dikangau Semenanjung Tanah Melayu. Udah nya ba taun 1963 lebuh kitai numbuhka Menua Malaysia dia Sabah enggau Sarawak ke bendar endang dua menua …. Sejarah pan enda sebaka. Taja pia lebuh Sabah enggau Sarawak setuju bela begulai numbuhka Malaysia, bisi sekeda pekara ti diudah baka ti disemaya ngambika iya dititih.”

    Perintah Menya meruan madahka Sarawak enggau Sabah enda patut digaga baka sebengkah ‘negeri’ dalam Perintah Besai tang ‘Bakih ti Sama’ ba pengawa numbuhka Malaysia.

    Ari nya, Perintah Menua ngelanggur numbuhka siti Raban Petugas Khas renggat tinggi ngambi berunding enggau Perintah Besai sereta mutarka isu nitihka penemu undang-undang enggau konstitusyen ti udah disebut aku dalam jaku tadi.

    Pemutar isu undang-undang enggau Konstitusyen ti beguna tu meseti digaga ba tikas pemadu tinggu ba renggat Perintah Besai enggau Perintah Sarawak.

    Nya alai, Perintah Nengeri enggau baruh ati minta Perintah Besai numbuhka sebengkah raban gawa khas ti sama, ngambi ngemuntang pengawa mutarka isu nya memanah sereta nyaga pemerat menua enggau hak nengeri Sarawak ti dijaga sereta dipanggaika ba penuduk ti patut.

    Pengawa ngemendarka mosyen tu enda patut ngasuh saru penemu tauka ngumbai menua tu rindu meda tauka ngeruga pengada Malaysia terus nyadi sebuah menua.

    Kitai bebasaka pemutus ti digaga bala pemesai menya ngambika nyadi sebagi ari Malaysia lalu kitai deka meruan diau dalam Malaysia. Anang bisi pengakang ati ba pekara tu. Kitai deka meruan negika semengat enggau jaku dalam Lagu Menua Sarawak :-

    “Sarawak dalam Malaysia

    Aman makmur rahmat Tuhan Maha Esa

    Kekallah Sarawak bertuah

    Teras perjuangan rakyat

    Berjaya berdaulat.” #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads