Header Ads

  • Berita Tebaru

    Ngemutarka Pemakai Menua enggau Pulau Galau deka ngambi timpuh ke panjai, ku Abang Johari

    Datuk Patinggi Abang Johari Tun Openg
    KUCHING: Kepala Menteri Datuk Patinggi Abang Johari Tun Openg madah, penanggul bekait enggau Pemakai Menua (PM), Pulau Galau (PG) enggau Tanah Adat (NCR) benung di kemutarka lalu deka ngambi timpuh ke lama minit ngemutarka pekara tu.

    "Perintah sigi benung dalam proses ngemutarka pekara tu.

    "Aku udah meri mandat ngagai Sapit Kepala Menteri (Datuk Amar Douglas Uggah anak Embas) ke nyadi Chairman PM enggau PG ngemutarka pekara tu begulai enggau tuai komuniti.

    "Beri sida iya timpuh jam ke chukup ngemutarka pekara tu laban pekara bansa tu enda tau enda dikemutar enggau silik agi.

    "Anang kelalu ngansak sida iya laban pekara tu sigi deka dikemutarka," ku Abang Johari.

    Iya madah munyi tu lebuh di asuh nimbal pasal gempuru ke 'Anak Sarawak, Tanah Airku' ti di atur ulih SADIA (Gerempung Dayak Iban Sarawak) enggau S4S (Sarawak 4 Sarawakians) ke ngelalau semua rayat Sarawak datai ngagai gempuru tu kena 13 November tu ila, di Kuching Waterfront ditu.

    Pinta gerempung tu, ngansak Perintah Menua ngemutarka penanggul tanah rayat menua tu enggau jampat.

    Seiku pengatur gempuru tu, Peter John Jaban madahka pemansang tanah udah betaun dikena nyadi perengka guna ke mensia mayuh.

    Iya madahka pekara tu ke patut dikemutar sereta bechairmanka Uggah kelalu lama enda di kemutar enggau jampat dataika sekeda mensia mayuh nyau enda tan ati nganti.

    Ku iya, kes NCR dalam kandang 20 taun tu udah majak nambah, lalu ba sida iya, Perintah Menua baka ke nadai ati ngemutarka pekara tu, dataika ngapil tanah NCR pan alah ba Kort Besai. #UtusanBorneo

    No comments

    Post Top Ad