Header Ads

  • Berita Tebaru

    Orang ti muai uras ba palan nadai dikemendar patut diukum

    Bruce Chai
    MIRI: Udah datai maya iya, piak bekuasa neritka atur ngagai orang tauka serikat ti muai uras sengapa ba palan ke nadai dikemendar.

    Chairman Parti Rakyat Bersatu (UPP) Pujut Bruce Chai madah, entara chara ulih nyadika bukti ngagai orang ti ngereja penyalah tu iya nya bisi gambar tauka video.

    “Kitai nadai pilih bukai. Kitai ngiga orang pun. Kitai nurun ngabas. Nyema bisi tetemuka orang tu muai uras ba palan nadai dikemendar, kitai deka nyaman,” ku Bruce.

    Bruce asa beratika agi mayuh orang ti ngembuan ulah rindu muai uras sengapa nyentuk tusah piak bekuasa deka mutarka penanggul tu.

    Penanggul bepun ari ulah orang ti ngira diri empu aja nadai berundingka pangka negetif ngagai orang bukai enggau rampa menua.

    Kelimpah nya, bisi mega ngembuan ulah ngelempaika tanggungpengawa meresi uras ba piak Kaunsil Mengeri Besai Miri (MBM) lalu ngujungka sida enggau kiruh.

    Bruce ngarap ukum ke berat ulih dipejalai ngagai orang ke ngereja penyalah bepelasarka undang-undang awakka penyadi kes enda bangat balat.

    “Maya aku dipadu nyadi kaban kaunsil (kaunsilor), aku merambu ngasuh undang-undang ‘wistleblower’ (pemeri penerang) tauka inisiatif ‘wistleblower’ dipejalai.

    “Pemeri penerang tau nganjung gambar ngagai piak kaunsil lalu diberi perais laban mantu nangkap orang ti salah,” ku iya.

    Bruce madah, sunagi enggau tasik ti kamah ukai agi ketegal peranak setinggan tang ketegal ari uras ke dibuai sengapa ngagai parit lalu anyut ngagai sungai enggau tasik.

    Pengawa muai teda industri nadai betagang mega ngujungka sungai enggau rampa menua kamah.

    Bruce madah, pemar pemadu baru piak bekuasa iya nya ngaduka teda digital perengka elektronik.
    “Aku deka ngasuh piak bekuasa masang pukat uras ba parit ke sauh bah enggau sungai.

    “Tu ulih ngurang pengamah ketegal teda uras,” ku iya.

    Entara pengawa bukai ke ulih dikereja baka ngatur kimpin penyedar ti ngajar mensia mayuh enggau industri pasal penanggul bekau ari pengawa muai uras sengapa. #UtusanBorneo

    No comments

    Post Top Ad