Orang tuai meseti bejalaika pengidup ti produktif - Berita Iban Online

Header Ads

  • Baru Nyadi

    Orang tuai meseti bejalaika pengidup ti produktif

    Dato Sri Fatimah Abdullah
    MUKAH: Tetiap iku orang tuai patut ngaga pengawa ti produktif dikena ngisi maya lepa sida kelebih agi bekaul enggau servis komuniti.

    Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah madah, umur tuai ti enda ngasuh leju sereta mayuh aktiviti deka meri pengelantang ba bemacham pekara nyengkaum batang tubuh, semengat sereta runding.

    “Pengidup maya umur tuai tetiap iku sida ti udah lunggar umur patut diisi enggau mayuh macham aktiviti dikena nyeliahka sida jampat leju sereta kusut runding,” ku iya rambau Pengawa Bejadika Nutup PrKomuniti Prihatin Warga Emas Harmoni Bagi Menua Mukah 2017 bepalan di Balai Komuniti Dalat kemari.

    Nitih ku iya, penanggul kusut runding tauka mayuh runding nyadi ba orang tuai kelebih agi sida ti ditinggalka pemati tauka nadai kaling beridup patut diseliah.

    Kebuah pia pekara tu deka ngasuh bemacham penanggul bekaul pengerai ti tau ngujungka sida bulih penusah.

    Iya meri chunto pemadu manah ti ditunjukka Serakup Aktiviti Orang Tuai (PAWE) Dalat ti ulih gawaka komuniti di menua nya nengah program ngaul komuniti sida.

    “Kitai temegah ati laban PAWE Dalat ulih mantu orang tuai ke bukai ngemanahka lima buah rumah di kandang menua Dalat tu,” ku iya nerang baru.

    Ngelansa pasal nyediaka diri napi status ‘Negara Tua’ datai ba 2030, Fatimah mega madahka perintah bisi sekeda perambu dikena napi pekara nya.

    Tu nyengkaum ngelangkar ‘Dasar Warga Emas Negara’ enggau ‘Pelan Tindakan Warga Emas’ dikena nyediaka bala komuniti kelebih agi rebak baru napi hari tuai ila.

    Ba opis menteri iya, pengawa nyediaka dua buah institusyen nyaga orang tuai di Kuching enggau Sibu ngagai sida ti seranta, diau sebatang kara tauka nadai orang enggau sebilik nyaga sida.

    Ba pekara bantu ari opis menteri iya, nyentuk diatu, skim Bantu Orang Tuai penyampau RM300 sebulan udah meri pemaik ngagai lebih 20,000 iku penerima.

    Ngelansa pasal PAWE, Sarawak diatu bisi semilan buah PAWE enggau penyampau kesemua kaban manggai 16,803.

    Berebak enggau nya, iya mega bisi ngemendarka Geran Projek Mit Pemansang Menua Pesisir (MRP) ngagai PAWE Dalat dikena bejalaika aktiviti sida.

    Sama bisi datai Residen Mukah Awang Johari Awang Mustapha, Pemesai Pelilih Dalat Kueh Lei Poh enggau Chairman PAWE Dalat Francis Klumai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads