PDRM Sarawak udah sedia nentuka pengelikun raban deligit WEIF 2017 - Berita Iban Online

Header Ads

  • Baru Nyadi

    PDRM Sarawak udah sedia nentuka pengelikun raban deligit WEIF 2017

    GAWA MANAH: Entara raban polis ke deka bejalaika pengawa nyaga pengelikun sekumbang forum WIEF 2017.
    KUCHING: Polis Diraja Malaysia (PDRM) Kontinjen Sarawak udah sedia nentuka pengelikun raban deligit ti deka ngulu Forum Ekonomi Dunia Islam (WIEF) berengkah ari 21 nyentuk 23 November tu.

    Kepala Polis Sarawak Datuk Amer Awal madah, bisi 1,402 iku pemesai enggau raban PDRM deka bejalaika pengawa sekumbang forum nya ti ke diatur ba Palan Aum Borneo Kuching (BCCK) ditu.

    “Kitai deka ngena semua elemen ngaul Unit Polis Temuai Bebasikal, Unit Matau Bemotosikal PDRM nyengkaum kereta pematau sereta mega elemen ke bukai ti deka digerah gawa maya forum nya,” ku iya.

    Iya mansutka jaku nya lebuhka dirandau pengarang berita rambau pengawa ngelancharka program ‘Dry Run WIEF’ ti ngaul raban polis trafik enggau Unit Polis Temuai Bebasikal ba mua laman sebengkah hotel ditu, ensanus...Sama bisi datai Ketuai Polis Pelilih Kuching ACP Abang Ahmad Abang Julai.

    “Program Dry Run tu nyadi pejalai protokol ti udah dikemendar ke alai kitai deka ngemai semua temuai chukup dipebasa (VVIP) enggau bala ketuai dunya ngagai endur sida, ari hotel ngagai BCCK lalu ari BCCK ngagai hotel,” ku iya.

    Nitih ku Amer, Opis Pemansik Penyalah Sarawak (JSJ) mega udah ngerah bala staf sida bejalaika pengawa meresa di hotel enggau kandang menua angat (hotspot) bukai di ngelingi mengeri tu.

    Seraya kandang menua baka Tebing Sungai Kuching, ku iya, deka meda penatai mayuh raban polis bejalaika pengawa matau dikena nyeliahka sebarang pengawa ti salah.

    “Kitai enggaika sebarang pekara enda disadang nyadi maya atur (WIEF) ila. Aku dekaka Sarawak dikelala di mata dunya ti ulih nyadi tuai rumah ngatur gempuru besai renggat antarabansa,” ku iya.

    Berindik ari nya, Amer minta kerejasama mensia mayuh ngambika besasar sepemanjai atur forum nya laban disadang deka bisi mayuh pejalai entukar perintah, entukar VVIP enggau deligit.

    “Taja pia, pekara tu patut diperunding enggau positif laban pengawa tikas antarabansa tu deka meri pemaik ngagai nengeri Sarawak,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads