Pelajar ti menyana nyadi pekara pemun pengidup meruan - Berita Iban Online

Header Ads

  • Baru Nyadi

    Pelajar ti menyana nyadi pekara pemun pengidup meruan

    Datuk Joseph Salang Gandum
    KUCHING: Pelajar ti menyana nyadi kunchi ngagai pengidup ti meruan taja jauh ari diri sebilik lebuh ngulihka penemu, kelebih agi bala nembiak sekula primari di kandang menua ulu Sarawak.

    Chairman Kaunsil Penyanding Penemu 1Malaysia Sarawak, Datuk Joseph Salang Gandum madah, taja nya pekara ti pedis, tang pemar tu deka muka pintu ngagai awak ke bisi sereta peneleba ti berega.

    “Aku nemu ubah tu nyangka tau ngasuh nangi, tang aku nyamin, tu nyadi jalai ungkup pengidup dudi hari ti meruan agi.

    “Mayuh entara kita napi pemar ninggalka diri sebilik kelebih agi ti keterubah. Taja pia sida ke bukai, nyangka udah diau jauh ari rumah, tang diatu patut nyingkang jauh agi nampung pelajar,” ku iya rambau bejaku ba mua bala nembiak di landang menua ulu Sarawak pengudah pemutus Ujian Pencapaian Sekolah Rendah (UPSR) dibantaika, apin lama ke udah.

    Salang ke mega Kaban Parlimen (MP) Julau madah, baka tebal agi nembiak ke bukai, iya mega diau bemalam di sekula kenyau ari Primari Lima di Sarikei, lalu semina betemu enggau sida sebilik di Bintangor maya ujung minggu.

    Pengudah nembuka Pom Lima ku iya, iya ninggalka menua Sarikei nampung pelajar Pom Enam di Miri sebedau ngagai menua tasik nampung pelajar tinggi agi di universiti.

    Taja jauh ari rumah nyadi siti pekara ti mar ku iya, nya nyadi pekara beguna endar nempa pemujur ti dijapai diatu.

    Ku iya nambah, tu mai peneleba chara berunding ke baru enggau nunjukka pemujur endang ulih dijapai nyema orang nya endang keran deka nyapai iya.

    “Ari nya, aku deka madah ngagai semua kita, singkang ke mua enggau ulah ti menuku. Kena pemar tu dikena meransang diri ti deka ngubah pengidup kita enggau apai indai dudi hari.

    “Pekara tu balat ngasuh nangi, tang iya mega deka muka pintu ngagai awak ti enda ulih diasaika kita enti enda nguji. Nya alai aku ngarapka semua kita mujur jemah,” ku iya meri peransang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads