Pemansang sistem pelajar ulih nempa modal mensia ti menyana - Berita Iban Online

Header Ads

  • Baru Nyadi

    Pemansang sistem pelajar ulih nempa modal mensia ti menyana

    UNGKUP KENANG: Anis Madeli (dua kanan) nyuaka tepa ngagai Uggah (dua kiba) seraya dikemata bala bukai.
    SPAOH: Pengajar bisi tanggungpengawa beguna endar nempa pemanah ulah bala nembiak nengah pelajar ti menyana. Nya kebuah, nengah pelajar ulih nempa rebak baru ti nyulut dudi hari.

    Sapit Kepala Menteri Sarawak, Datuk Amar Douglas Uggah Embas madah, rebak kemaya hari betuah endar bisi bemacham perengka guna ti meruan nyema dibanding enggau perengka guna sebedau tu. Semua penerang muntang diulih sekalika nengah internet tauka perengka guna ti disediaka sekula.

    Iya ke mega Kaban Kunsil Nengeri (ADUN) Bukit Saban mansutka jaku nya lebuh bejaku bejadika Pengerami ‘Anugerah Kecemerlangan dan Apresiasi’ Sekula Sekondari (SMK) Spaoh, semak ditu,ensana.

    Pia mega ku iya, sistem pelajar di nengeri tu diatu majak mansang dibanding ke suba lalu bala pengajar dilatih memanah seriris enggau peminta kemaya hari nempa pengajar ti bisi kualiti.

    Ngelansa pasal pengerami nya, ku Uggah, pengerami ke bansa nya endang manah lalu iya muji raban ngatur pengawa sekula laban udah mujur meri anugerah ngagai bala nembiak ti nyulut ba tetiap subjek.

    Ku iya, penyulut bala nembiak ukai semina bepanggai ba akademik aja, tang mega bidang ko-kurikulum, bela beguna.

    Seraya madahka penyapai sekula majak manah, Uggah ngarapka pengawa nya seruran dipejalai sereta meri pengaga ati laban taun tu penyapai pemadu manah ari taun ke udah ke alai mayuh nembiak nyulut agi ba pelajar sida sereta chakah ngaul diri dalam ko-kurikulum.

    “Pemutus ba peresa majak manah ninting taun lalu tu nyata ngayanka sistem pelajar di sekula tu ulih diterima semua nembiak,” ku iya.

    Berebak enggau nya, Uggah mega ngarapka apai indai seruran matau aktiviti luar bala anak sida kelimpah bela ngajar anak sida.

    Ba lansa ke bukai, pengawa perintah ngemai rentayan sambung internet bepeneras tinggi di Sarawak, Uggah ngarapka perengka guna nya ulih dikena memanah sereta ngarapka raban sekula ulih nempa nembiak landik dalam teknologi pemadah (IT) enggau penembu antena baru ti benung digaga di sekula nya ari raban SACOFA.

    Nangkan nya, Uggah bisi ngemendarka agih belanja penyampau RM30,000 ngagai Gerempung Apai Indai enggau Pengajar (PIBG) sekula nya, RM10,000 dikena meli bup di librari kelimpah RM500,000 dikena pemansang sekula di baruh Projek Transformasyen Menua Pesisir (RTP) lalu nya semua agih belanja ungkup taun 2018.

    Kelimpah ari nya, ba pengawa ngangkatka agi penyapai ba sekula enggau bala nembiak, Uggah mega bisi ngemendarka beberapa insentif ungkup bala nembiak ti bulih 6A ba UPSR enggau 9A ba SPM 2017.

    Sama bisi datai, Penulung Pemesai Pelajar Pelilih Betong, Aleksay Aman, Pemesai Pelilih Betong, Khalid Andong, Prinsipal SMK Spaoh, Anis Madeli, bala ketuai opis perintah sereta ketuai raban bansa ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads