Penegap parti bepun ari ulah ti taluk, ku Awang Tengah - Berita Iban Online

Header Ads

  • Baru Nyadi

    Penegap parti bepun ari ulah ti taluk, ku Awang Tengah

    Datuk Amar Awang Tengah Ali Hassan
    Besai pan penuduk dalam parti enti enda kering napi penusah, penuduk nya nadai reti.

    SANTUBONG: Ulah taluk ngagai parti meseti dikemeran ngambika parti seruran tegap, ku Sapit Presiden Parti Pesaka Bumiputera Bersatu (PBB) Datuk Amar Awang Tengah Ali Hassan.

    Ku iya, pemaik parti (PBB) meseti dulu dikemerat ari penguntung diri ketegal runding nya mih ngujungka PBB nyadi parti lumur dua pemadu besai di menua tu.

    “Besai ni pan penuduk kitai dalam parti tang enti parti kitai enda kering sereta napi penusah, penuduk nya nadai mai reti.

    “Berindik enggau nya, kitai meseti ngemeranka ulah talukka parti sereta ngesan tanggungpengawa ungkup pemaik parti,”ku iya.

    Awang Tengah mansutka jaku nya rambau bejadi Aum Besai Deligit PBB pampang N.4 Pantai Damai ke diatur di Damai Beach Resort, Santubong ditu.

    Beambika chunto pengawa besilih kuasa kepala menteri, iya madah raban ketuai renggat tinggi sigi seruran ngemeran semengat nya.

    Ku iya, maya Pehin Sri Tun Taib Mahmud deka ngelengka kuasa nyadi kepala menteri ngagai ketuai bukai (Tok Nan), pengawa nya diatur enggau lanchar.

    “Maya nya mayuh macham berita selebubu didinga, sekeda madah deka nyadi penyarut,”tang pekara nya enda nyadi.

    “Pengudah Pehin Sri mantaika tiga nama chalun nyadi kepala menteri iya nya Tok Nan, Abang Johari enggau aku, kami tiga lalu berandau sereta setujuka siti pekara.

    “Niang Tok Nan lalu bejaku (ngarika kami) madah mandat milih kepala menteri diberi ngagai presiden parti (Pehin Sri Tun Taib) lalu nya disetuju semua kaban kunsil tinggi PBB.

    “Pengudah Tok Nan dipilih, semua setuju lalu nyukung,” ku Awang Tengah ke mega Sapit Kepala Menteri.

    Iya nambah semangat nya udah mai pemujur besai ngagai Barisan Nasional (BN) Sarawak ba Pengawa Bepilih Nengeri Ke-11 (PRN11) ke diatur ba bulan Mei 2016.

    BN ba PRN11 ku iya menang 72 ari semua 82 penuduk ke alai PBB menang 100 peratus.

    “Pemidang Tok Nan ngujungka Abang Johari dipilih nyadi kepala menteri lalu pemutus nya mega udah disetuju semua.

    “Tu mih chara politik dalam PBB ke nadai ba parti bukai. Nengah kerejasama, pemereti enggau pengarap ba tetiap iku kaban parti, kitai ngenanka hak sereta pemaik parti,”ku iya.

    Bela datai Ketuai PBB pampang N.4 Pantai Damai ke mega Menteri Muda Utiliti Dr Abdul Rahman Junaidi, Menteri Muda Pemansang Dagang Mit enggau Jelan Pemesai Datuk Mohd Naroden Majais enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads