Penerang ke ngumbai PBB enggau PRS bisi charut semina jaku sengapa - Berita Iban Online

Header Ads

  • Baru Nyadi

    Penerang ke ngumbai PBB enggau PRS bisi charut semina jaku sengapa

    Datuk Amar Douglas Uggah Embas
    KUCHING: Penyarut ke bisi nyadi madahka Parti Pesaka Bumiputera (PBB) enggau Parti Rakyat Sarawak (PRS) benung charut penemu bekait enggau (mosyen ubah) Seksyen 5 Kanun Tanah Menua maya aum Kunsil Nengeri tu tadi, semina jaku selebubu sereta ditempa orang sengapa.

    Sapit Kepala Menteri ti mega Menteri ke megai tanggungpengawa mutarka Tanah NCR, Datuk Amar Douglas Uggah Embas enggai nimbal jaku ke dibantaika siku penguna media rama tang ku iya, nya semina ‘jaku sengapa’.

    “Aku enggai nimbal jaku nya (penerang media ari PBDSB), uji gaga pengawa ke bisi pemaik,” ku Uggah ke enggai ngemanjaika pekara nya.

    Pia mega enggau saut ari Sapit Kepala Menteri, Tan Sri Datuk Amar James Jemut Masing, ke madahka nadai laya entara PRS enggau PBB bekait enggau ubah undang-undang Tanah NCR nya.

    “Parti Rakyat Sarawak (PRS) sepenemu nganti Datuk Amar Uggah (Datuk Amar Douglas Uggah Embas) nembuka pengawa iya (mutarka penanggul tanah NCR).

    “Kami (PRS) deka meri timbal (input) kami enti diasuh meri timbal dudi hari,” ku Masing madah nengah pesan jaku pandak ‘whatsapp’ ngagai pengarang berita ditu, kemari.

    Ba tanya pemberita enti Masing bisi ba Aum Kunsil Nengeri (lebuh Ketuai Parti Keadilan Rakyat (PKR) Sarawak, Baru Bian mantaika mosyen pasal penanggul Tanah NCR ba aum Kunsil Nengeri tu tadi), ku Masing, iya sigi nadai maya timpuh nya.

    “Maya nya, aku nadai ba Aum Kunsil Nengeri laban bisi pemerat bukai ke begunaka aku di luar (luar Aum Kunsil Nengeri).

    “Bekait enggau penerang media PBDSB nya, artikel ke dibantaika sida iya ‘speculative in nature’,” ku iya.

    Ba penerang media ke dianjung PBDSB betopik ‘PBB dan PRS Dalam Krisis, Masing Keluar BN – Cobbold John’ nusui jaku sentang penyarut bisi nyadi entara Masing enggau Uggah bekait enggau (mosyen ubah) Seksyen 5 Kanun Tanah Negeri maya Aum Kunsil Nengeri tu tadi.

    Jaku media PBDSB nya sebaka enggau jaku siku penguna akaun ‘Facebook’ ke madahka ‘PRS and PBB clash over NCR Issue?’.

    Dalam jaku nya madahka Masing melaba mosyen ke dibantaika Baru Bian, dikena Barisan Nasional (BN) Sarawak.

    Taja pia, kenu ku jaku nya madahka peragam Masing dibantah ketuai kanan PBB, Datuk Amar Douglas Uggah Embas enggau Datuk Abdul Karim Rahman Hamzah.

    “Berindik ari nya, sida iya bisi charut dataika Masing nadai ayan maya aum DUN lebuh mosyen dibantaika Baru Bian,” kenu ku penerang media PBDSB nya.

    Berindik ari jaku nya, presiden PBDSB, Cobbold John, ngarika PBDSB minta penerang ari Masing enggau Uggah, kebuah kededua ketuai tu enda sepenemu ba usul ke dibantaika ulih Baru.

    “Aku bisi macha penerang nya, lalu usul nya dipeda aku silik sereta mutarka penanggul NCR di Sarawak,” ku Cobbold, ke mega ngansak Uggah jampat mantaika resolusyen Tanah Adat Bansa Asal (NCR). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads