Pengajar patut nerima ubah pelajar menua seriris enggau pemansang dunya - Berita Iban Online

Header Ads

  • Baru Nyadi

    Pengajar patut nerima ubah pelajar menua seriris enggau pemansang dunya

    Datuk Snowdan Lawan
    SRI AMAN: Bala pengajar menua pesisir patut meretika ubah pelajar menua ngambika mansang agi sereta ulih besemekih seriris enggau pemansang menua, pia ku Menteri Muda Nembiak enggau Lumba Sarawak, Datuk Snowdan Lawan.

    Senentang pekara tu ku iya, tetiap iku pengajar patut bekerejasama enggau Gerempung Apai Indai enggau Pengajar (PIBG) ngambika sekula ulih mansang agi sereta besemekih seriris enggau pemansang menua kemaya hari.

    “Bala apai indai mega patut bisi penyiru ba pelajar bala anak sida lalu anang kelalu ngelempaika tanggungpengawa nya ngagai bala pengajar aja.

    “Kebuah pia, bala anak kitai tu ti deka nyadi ketuai megai menua jemah ila,” ku iya.

    Iya ke mega Kaban Kunsil Nengeri (ADUN) Balai Ringin mansutka jaku nya nengah jaku iya ti dibacha pengari iya, Pemesai Pelilih Sri Aman, Ismawie Salleh lebuhka bejaku bejadika Pengerami Konvokesyen Tabika Opis Pemansang Mensia Mayuh (KEMAS) Bagi Menua Sri Aman bepalan di Balai Suarah semak ditu pagi kemari.

    Berebak enggau pengerami nya, Snowdan mega meransang semua raban patut bekerejasama nayup perintah ba pekara pelajar lalu anang enda ibuh sereta enda kelalu bepanggai ba subsidi sereta bantu perintah aja.

    Ku iya, perintah udah mayuh mantu nyedika bemacham perengka guna enggau kereban dikena sekula enggau pengajar dikena mantu nambahka penyulut sekula.

    Nya alai ku iya, bala pengajar patut ngena awak nya dikena nambahka penyapai sekula enggau nyeridi sereta nempa modal mensia ti menyana, meruan enggau pegari nama.

    Sama bisi datai Pemesai KEMAS Bagi Menua Sri Aman, Josipah Sabas sereta bala bukai.

    Bisi 237 iku nembiak Tabika ari 39 buah Tabika KEMAS di Sri Aman bela nerima perais sida empu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads