Pengawa PDRM rambau Gempuru Likun Tanah NCR dipuji - Berita Iban Online

Header Ads

  • Baru Nyadi

    Pengawa PDRM rambau Gempuru Likun Tanah NCR dipuji

    Nicholas Mujah Ason
    KUCHING: Raban pengatur Gempuru Likun Tanah NCR kena 13 November tu tadi, meri terima kasih ngagai Polis Diraja Malaysia (PDRM) ke udah bejalaika pengawa sida enggau chukup manah.

    Sekretari Besai Serakup Gerempung Iban Dayak Sarawak (SADIA, Nicholas Mujah Ason madahka, diatu udah manggai timpuh seminggu gempuru nya udah di atur, alai sida pan nadai nerima sebarang panggil tauka penanggul.

    “Naka kediatu, kami nadai nerima panggil ari polis enti kami bisi napi sebarang penanggul tauka mansik kami. Reti nya, polis nadai penanggul enggau kami ke ngatur gempuru likun nya laban semua atur ke udah disemaya, dititih memagang.

    “Kami beterima kasih ngagai PDRM ke udah ngemendarka kami begempuru sereta lantang ati enggau chara profesional sida iya mutarka pengawa kami ,” ku Nicholas.

    Iya madah munyi nya lebuh nimbal nengah aplikasyen ‘whatsapp’ nuju pemberita ditu, kemari.

    Ba pekara ke sama, Nicholas madah, iya berasai temegah ati sereta enda ngadang meda timbal bekait enggau gempuru nya nerima timbal ke manah,alai mayuh endar raban tu datai ari jauh enggau semak, dataika bisi sekeda nya datai ari Limbang sereta Kapit, taja pan maya ngaga gempuru nya, hari orang gawa, ku iya.

    “Kami (SADIA) beterima kasih ngagai semua sida ke ngatika diri (volunteer) sereta raban komiti ke bendar endar udah ngaga pemujur pengawa tu, ke matu raban polis, laban enggaika bala bisi penanggul, sereta besaup bekemas sereta bebuaika uras engudah abis gempuru nya.

    “Kami mega beterima kasih ngagai semua sida ke udah nyukung pengawa kami taja pan enda ulih datai ngagai pengawa kami. Ke semua pemanah kita, udah mandangka Orang Asal (Indigenious People tauka IP) Sarawak, orang ke siru, likun sereta komuniti ke nitihka atur undang-undang ba mata dunya,” ku iya.

    Maya gempuru likun kena 13 November tu tadi ti digaga SADIA sereta sekeda raban komuniti IP, urung 3,000 mensia mayuh enggau ngulu gempuru likun nya.

    Siku ari pengatur gempuru tu, Bill Jugah madahka taja pan raban pengatur melabaka bala Yang Berhormat (YBs) sereta menteri ari kededua piak parti politik enggau ngulu gempuru nya, nadai mai ati ke prejudis, sama-sama enggau ngulu bala mayuh.

    “Enti nyema sida iya bisi datai pan, bisi endar reti ba kami, laban mensia mayuh ke enggau ngulu gempuru nya pan gaga ati meda pengari sida iya sama nyukung pemerat kami.

    “Semina sepekara ke dipadah kami bekait enggau gempuru tu, iya ukai bepelasarka politik, tang penanggul ke ditap rayat, ari tiap pupu bansa sereta pengarap, ari semua etnik, sereta semua parti politik mandangka penyerakup sereta penemu sida iya bekait enggau penanggul tanah NCR tu,” ku Bill.

    Iya madahka Orang Asal Sarawak, ukai semina mungkur bansa Dayak aja, tang nyengkaum bansa Melayu, Melanau enggau Orang Ulu, laban sida tu ke diau ba tanah sereta menua nya, ke ngembuan Pemakai Menua (PM), tanah sida dikumbai ‘pimu’ung.

    “Nya alai, gempuru likun nya sigi patut digaga, beratika mayuh endar kes tanah ke agi nganti bechara di kort tauka udah dipechara tang enda nerima pemutus kort ke ngipak pemerat orang asal menua tu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads