Pengeraja asal pakej dagang temuai ti nyelai disedia ngagai temuai ari menua luar - Berita Iban Online

Header Ads

  • Baru Nyadi

    Pengeraja asal pakej dagang temuai ti nyelai disedia ngagai temuai ari menua luar

    Datu Ik Pahon Joyik
    KUCHING: Sarawak seruran nyendia pakej dagang temuai ke nyelai bepelasarka pengeraja asal iya nya pemaik rampa menua enggau main asal peranak nengeri tu ungkup rayat menua luar.

    Sekretari Mendam Opis Menteri Dagang Temuai, Seni, Main Asal, Nembiak enggau Lumba Datu Ik Pahon Joyik madah servis enggau produk dagang temuai ke disedia sigi deka ngemantup pinta orang dagang temuai ke datai nemuai ke Sarawak.

    “Ketegal nya, kitai meseti ngenanka rampa menua kelebih agi palan ke tau ngasuh rindang ti manah ngambika bela diasai rayat menua luar,”ku iya.

    Iya mansutka jaku nya ba jaku pengelalu sesi randau ‘Sarawak Fokus’ nyerumba Forum Ekonomi Islam Sedunya (WIEF) Ke-13 di Palan Aum Borneo Kuching (BCCK) ditu, ensanus.

    Ngenang kaul ke sama, Pahon madahka Sarawak ulih diangkat nyadi kampung galau ke penudi ungkup peranak dunya ngambi sida tau ngasaika pemaik rampa menua.

    “Kitai mega seruran merambu deka ngemansang kandang endur ke nyelai ti diintu lalu diangkat nyadi palan dagang temuai.

    “Berindik enggau nya, perintah udah nyendia Pelin Besai Dagang Temuai dikena ngemansang Lundu, Sematan enggau Tanjung Datu nyadi palan dagang temuai,”ku iya.

    Ku iya, kandang endur nya ngembuan pantai ke bedau dipeda orang ari menua luar ke alai pemeranak puku sigi dikelalau datai.

    “Kelimpah pantai, kitai mega ngelaluka pemeranak puku tauka orang ke bisi kaul ba industri dagang temuai ari menua luar ngambika sama bela ngemansang kandang tasik ba palan tekat ai di nengeri lalu diangkat nyadi palan dagang temuai,’ku iya.

    Pahon nambah, industri dagang temuai di nengeri tu beratka atur matak peranak asal ngambika sama bela nyendia servis ngagai temuai ke datai.

    “Atur tu ulih nyaup komuniti lalu nerenak pemereti ba runding sida laban pesaka ke berega tu meseti diintu enggau manah,’ku Pahon.

    Sesi randau Sarawak Fokus diatur CEO Oake Media, Singapura Lisa Oake ke bela matak panel ‘khas’ iya nya Chairman Lembaga Amanah Taman Sabah Datuk Seri Tengku Dr Zainal Adlin Tengku Mohamood. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads