Pengeransing gerempung lumba, main di Sarawak ulih nyapai tikas ‘Sport Powerhouse’ - Berita Iban Online

Header Ads

  • Baru Nyadi

    Pengeransing gerempung lumba, main di Sarawak ulih nyapai tikas ‘Sport Powerhouse’

    Hii Chang Kee
    SIBU: Pengeransing enggau kerejasama ti manah entara perintah nengeri enggau gerempung lumba enggau main nyadika pengering nengeri Sarawak ngelawa tikas ‘Sport Powerhouse’ di menua tu.

    Residen Sibu Hii Chang Kee madah, pekara tu kelebih agi bepanggai ba pengeransing gerempung lumba enggau main ti sebengkah ari gempung kerejasama ke besai reti ngagai perintah ngemansangka lumba enggau main.

    “Perintah nengeri Sarawak endang ngemeratka lumba enggau main alai nengeri tu udah bekenaka mayuh belanja dikena nyaup ngemujurka program latih tauka dikena nyikap atlet ngambi bagi ba sesebengkah pekit.

    “Nya alai, dikena nimbal tu, gerempung lumba enggau main meseti chakah baka ngatur mayuh agi pekit, kus tauka woksyop,” pia ku iya madah.

    Iya mantaika jaku nya maya ngarika Menteri Muda ba Opis Kepala Menteri (Pemansik Sains enggau Bioteknologi) Dr Annuar Rapa’ee bejadi pekit ‘Golden Glove’ Renggat Menua 2017 di Stadium Tertutup Sibu, lemai kilah ensana.

    Sama bela datai maya tu iya nya Presiden Gerempung ‘Boxing’ Sarawak Dato Rahman Lariwoo.

    Berebak enggau nya, Hii mega minta penemu madahka main ‘boxing’ sebengkah main ti tau nempa ulah enda manah patut ditukar.

    Ku iya, main tu ukai semina nempa pengering fizikal enggau runding tang tau bendar nempa ulah manah ba diri.

    “Ke beguna iya nya kitai empu meseti nemu nyaga ulah diri,” ku iya madah baru.

    Hii bela ngarapka pekit ke diatur nya tau nyadika paltform dikena ngangkatka pengelandik bala ‘boxer’ ba renggat nengeri lalu dipilih ngarika bepekit ba renggat menua.

    “Ari tu kitai deka nyidi pengelandik bala ‘boxer’ ti nangkan ke sida tu patut diberi latih ke betandu sereta manah nyentuk nyadi siku ‘boxer’ ti chukup bepengelandik.

    “Pia mega gerempung tu patut bisi pelin dikena meri peneleba ngagai bala ke baru ngambika pengelandik sida enda naka nya aja,” pia ku iya madah.

    Pekit ‘Golden Glove’ sebengkah pekit ti tebilang ba main ‘boxing’ ari baruh Gerempung Boxing Amatur Dunya (AIBA).

    Pekit serak tu ti diatur Gerempung Boxing Sarawak bekerejasama enggau Geremoung Boxing Malaysia, Kaunsil Lumba enggau Main Nengeri sereta Opis Menteri Raban Nembiak Lumba enggau Main berengkah 27 November nyentuk 3 Disember.

    Di Sibu, pekit nya keterubah iya diatur kenyau ke diatur di Malaysia ba taun 1982 suba.

    Ba pekit keterubah, pemekit ari Sarawak Xiaver Sangi alah ngelaban Nik Hafizi Syahid ari Perak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads