Penumbuh NRDA deka nyungkak ekonomi adap utara menua Sarawak - Berita Iban Online

Header Ads

  • Baru Nyadi

    Penumbuh NRDA deka nyungkak ekonomi adap utara menua Sarawak

    Dr Haji Abdul Rahman Bin Haji Ismail
    LIMBANG: Perintah nengeri numbuhka sebuah ejensi baru, Ejensi Pemansang Utara Sarawak (NRDA) ti megai tanggungpengawa ngerichahka agi pemansang ekonomi tungga ke utara nengeri tu ti ngaul menua Limbang enggau Lawas.

    Menteri Muda Betanam Betupi, Dr Haji Abdul Rahman Ismail Bin Haji Ismail madahka NRDA deka ngemeratka pemansang ekonomi nyengkaum pengawa betanam betupi ti dipejalai di bagi menua Limbang.

    “NRDA deka mungkur pemansang ekonomi Limbang enggau Lawas ti deka diketuaika Sapit Kepala Menteri Datuk Amar Awang Tengah Ali Hasan,” ku iya lebuh bejadika Pesta Bebuak Meritam 2017 ditu, ensanus.

    Sama bisi datai Pemesai Pelilih Limbang, Jamalie Busri, Ketuai Kunsil Opis Pelilih Menua MDL Kaunsilor Sufian Mohat, Sekretari MDL Shariman Faizul Abdullah, Chairman Pengatur Program Kaunsilor Datin Tiong Siew Chin, Ketuai Kampung Meritam Mahmud Gampal sereta bala bukai.

    NRDA di baruh Komiti Pemansang Koridor Wilayah (RECODA) pengudah Ejensi Pemansang Ulu Rajang (URDA) enggau Ejensi Pemansang Tanah Tinggi (HDA) ditumbuh.

    Pengawa numbuhka NRDA ku Dr Abdul Rahman dikena ngenyempat enggau meri empas ba pemansang sektor agrikultur, dagang temuai enggau pemansang rampa menua di kandang menua nya.

    Kaban Kunsil Nengeri (ADUN) Bukit Kota nampung silik agi madahka raban Kaunsil Pelilih Limbang (MDL) patut ngelipatka pengawa ngelala menua ti manah di pelilih nya ngambi nyadi pematak penatai temuai.

    “Limbang nyadi palan penama pengusung ari luar. Pengelebih garis entara menua besepiak enggau Brunei sereta Kalimantan Indonesia, besemak enggau Sabah sereta Wilayah Persekutuan Labuan enggau Miri ulih matak penatai pengusung ari luar,” ku iya.

    Ku iya, sepenyampau RM1.5 juta udah dibelanja dikena ngintu perengka guna di Lumpur Bebuak lebih 10 taun ke udah.

    Pesta Lumpur Bebuak ku iya, beguna endar laban bisi daya pematak penatai bala temuai nyengkaum ari Eropah.

    Ku iya, pemansang dinamik seruran berubah lalu enda tetap.

    “Perintah responsif nerima penemu enggau ngiga jalai dikena nangkup peminta enggau peneka rayat” ku iya.

    Kelimpah ari Lumpur Bebuak, kandang menua bukai di pelilih nya ti deka diangkat dikena matak penatai pengusung ti ngaul Bukit Buda enggau ke bukai.

    Iya dekaka komuniti di menua nya kreatif agi ngambika ulih ngerebut awak ba pengelebih ke bisi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads